DILI, STLTIMORLESTE.com – Loron 30 Agostu 1999 hanesan Loron Konsulta Popular, importante tebes iha istória Timor-Leste. Tanba ne’e, estudante sira presiza hatene no komprende istória luta ba ukun rasik aan.
Diretor Eskola ESTV-IT 28 de Novembro Becora-Dili, Tomas Pinto hato’o ba STL iha Sabadu ne’e (29/08/2026) katak, estudante sira presiza komprende signifikadu husi Loron Konsulta Popular no valoriza luta povu Timor oan nian.
“Iha loron ne’e, populasaun Timor oan ho barani determina sira-nia futuru hodi hili ukun rasik aan. Tanba ne’e, Loron 30 Agostu 1999 ka Loron Konsulta Popular nu’udar loron ho folin boot tebes iha istória Timor-Leste. Iha loron ne’e, populasaun Timor oan ho barani determina sira-nia futuru hodi hili ukun rasik aan no independénsia, maske enfrenta risku boot no ameasa oioin,” nia afirma.
Iha okaziaun selebrasaun Loron Konsulta Popular, Tomas hato’o mensajen prinsipál ba estudante sira atu komprende no hahi’i loron istóriku ne’e, liu-liu kona-ba espíritu brani no unidade povu Timor-oan.
Nia dehan, estudante sira presiza hatene katak ukun rasik-an la mai gratuitu, maibé hetan liu husi luta no sakrifísiu. Loron 30 Agostu 1999 hatudu brani no unidade povu Timor-Oan nian hodi foti desizaun istórika ba futuru nasaun.
“Ita-nia jerasaun foun tenke kaer metin espíritu unidade ne’e iha eskola no komunidade. Husi kilat ba kadi aas, ne’ebé mak edukasaun, sira-nia avó no inan-aman sira funu ho kilat no halo sakrifísiu atu liberta rai ne’e. Jerasaun foun nia funu ohin loron mak estuda ho brani, aumenta konesimentu no uza teknolojia, no sai rekursu umanu ne’ebé matenek atu haburas ekonomia rai nian,” nia esklarese.
Tomas hatutan katak estudante sira mós presiza respeita no valoriza erói no sasin-vivu sira, no konserva istória atu labele haluha identidade nasionál.
Nia dehan, povu Timor-Leste, husi leste to’o sul, feto no mane, hotu-hotu hamutuk foti desizaun importante iha tinan 1999.
Tuir Tomas, sidadania responsável iha ukun rasik-an signifika mós iha responsabilidade. Estudante sira tenke hatudu responsabilidade liu husi kumpri regra eskola, respeita profesór sira, no kontribui ba estabilidade nasaun nian liu husi asaun pozitivu no promove dame.
(jac)
