DILI, STLTIMORLESTE.com – Primeiru Ministru (PM), Kay Rala Xanana Gusmão ho ekipa ohin bá Indonézia hodi kontinua negosiasaun formál fronteira marítima entre Timor-Leste ho Indonézia ronda da 4.
Iha vizita traballu ne’e, PM Xanana sei partisipa iha série ajenda sira iha Bali no Jakarta, inklui vizita bá Sentru Triángulu Korál no kontinua negosiasaun formál fronteira marítima.
Negosiasaun fronteira marítima bá dala-4 sei realiza iha Jakarta, iha loron 1 Setembru 2026, ho partisipasaun hosi delegasaun Timor-Leste no Indonézia.
Durante estadia iha Bali, PM Xanana mós sei simu urnas sira Bispu Dom Jaime Garcia Goulart, Bispu Dom José Joaquim Ribeiro no Monseñor Martinho da Costa Lopes iha Aeroportu Internasionál Ngurah Rai.
Aleinde ne’e, PM Xanana sei partisipa iha Konferénsia Honoris Causa ne’ebé organiza hosi Universidade Hasanuddin.
Tuir ajenda, PM Xanana ho delegasaun sei fila fali mai Timor-Leste iha 7 Setembru 2026.
Iha Fatin ketak, Jestor Postu Administrativu Nitibe, Agustinho Afulit, hanesan Sidadaun Timor Leste no nuudar Oecusse oan reprezenta Nitibe oan iha Suku Beneufe Apresia bá Xefe estadu Ninia esforsu hodi rezolve delimitasaun Fronteira Marítima no Terestres Timor Leste ho Indonezia, espera molok mandatu IX Governu Ida nee remata, sei iha rezultadu posetivu.
“Ita reza bá Maromak no Rai Lulik Timor Leste atu akompanha nafatin Maun boot PM Kay Rala Xanana ho Ninia ekipa delimitasaun Fronteira Marítima no Terestres atu nunee bele iha solusaun nunee, bá futuru linha Fronteira Rai Rua labele husik bá jerasaun kontinuador Rai doben Timor Leste,” dehan Jestor Nitibe.
Iha biban nee, nia agradese bá esforsu tomak PM Xanana atu kontinua fo importansia bá delimitasaun Fronteira Marítima no Terestres Timor Leste no Indonezia.
(jos)
