DILI, STLTIMORLESTE.com – Estudantes husi Eskola Hotelaria no Turizmu Becora laiha ezame segundu periodu, maibe bainhira sira atu tuir ezame modular nee depende ba kada profesores disiplina ida-idak nian.
“Hau hanoin ezame modular nee tuir profesores ida-idak, kuandu sira halo ezame hotu direitamente sira halo avaliasaun, nee duni ezame refere depende ba kada profesores disiplina ida-idak nian, se nia modul oituan ezame lais, se karik modul barak entaun modul nee hotu mak foin bele ezame, tanba nee la hanesan,” dehan Diretor Eskola Hotelaria no Turizmu Becora, Charles F. Guterres ba STL iha nia knaar fatin, Sesta nee (10/07/2026).
Nia dehan, nee duni data ida 13 agora nee ba eskola tekvo laiha, maibe ida nee ba estudantes sira husi nibel sekundariu jeral ho ensinu baziku primeiru no terseiru siklu mak sei partisipa iha ezame segundu periodu, maibe ba estudantes tekniku vokasional sira laiha ezame, no sei iha ezame modular deit.
“Total ami nian estudantes neebe mak sei tuir ezame modular nee hamutuk 315, husi numeru nee kompostu husi departamentu tolu mak hanesan departamentu hotelaria, kulinaria, nomos departamentu kustura. Ami nian atividades aprendizajen kada loron ba ami nian estudantes sira lao normal hela, sala neebe estudantes uza ba aprendizajen nee hamutuk sia, no sala pratika nian tolu,” nia afirma.
Tuir nia, durante nee profesores husi eskola ida nee halo planu de aula, bainhira atu hanorin estudantes sira iha sala, profesores balun sira nian planu aula nee submete antes tiha ona. Atividades extra ba estudantes sira nee agora daudaun sei halao iha loron Sabadu deit mak sira aprende lian Ingles no lian Japaun nian nee sei paradu hela.
Nunee mos Diretor Eskola ESTV-IT 28 de Novembro Becora-Díli, Tomas Pinto hatete,estudantes husi Eskola ESTV-IT 28 de Novembro Becora-Díli laiha ezame segundu periodu, maibe ezame modulares lao nafatin, depende ba kada profesores.
“Relasiona ho ezame segundu periode ou segundu trimestrál ba ESTV la iha ezame, maibe ezame modulares lao nafatin depende kada profesores materia neebe kuandu modulo hotu bele fó ezame direita, maibe ami mós iha planu nafatin lao tuir ezame modulares hamutuk ho estudantes sira husi Ensinu Sekundáriu Jeral, neebe ami la forma komisaun ida,” nia esplika.
Tomas hatete, daudaun nee total estudantes neebe sei tuir ezame modulares nee hamutuk 335 pessoas, husi mumeru ida nee kompostu husi departmentu haat maka hanesan arte grafika, eletronika, eletrisidade no informatika, kada loron estudantes sira ativu iha prosesu ensinu aprendizajen husi profesores sira.
“Ami nian profesores ba area produtivu sira nee, durante nee sira la partisipa iha formasaun, maibe oinsa mak profesores sira nee partisipa, hodi nunee bele aumenta konhesimentu konhesimentu ba ita nian profesores sira, depois ami nian profesores ba area produtivu hee ba oin presiza aumenta, tanba ami sei menus profesores, ho rekrutamentu neebe halo husi ME nee bele responde ba eskola neebe menus manorin,” katak nia.
(jac)
