DILI, STLTIMORLESTE.com – Komando F-FDTL aprezenta prioridade no nesesidade orsamentál ba 2027, liu husi audiénsia públika Komisaun B Parlamentu Nasionál.
Liu husi Komunikadu Impresa ne’ebe STL asesu iha media F-FDTL katak, iha loron segunda 26/10/2026 nee Komandu FALINTIL-Forsa Defeza Timor-Leste (F-FDTL), reprezenta husi Adjuntu Xefe Estadu-Maior, Koronel Tirosinado Mário Baptista “Bersama”, partisipa iha audiénsia públika kona-ba Orsamentu Jerál Estadu (OJE) 2027, hamutuk ho Divizaun Planeamentu no Divizaun Finansa.
Iha audiénsia ne’e organiza husi Komisaun B Parlamentu Nasionál, ho objetivu atu analiza no diskute prioridade, nesesidade no proposta orsamentál ba tinan fiskál 2027, liuliu iha área defeza no seguransa nasionál.
Atividade ne’e envolve mós Ministériu Defeza (MD) no instituisaun sira iha nia tutela, inklui Institutu Defeza Nasionál (IDN) no Autoridade Marítima Nasionál.
Partisipante sira iha oportunidade atu aprezenta programa, atividade no planu dezenvolvimentu institusionál ne’ebé planeia atu implementa iha 2027.
Asuntu sira ne’ebé diskute inklui nesesidade rekursu finanseiru no umanu, dezenvolvimentu rekursu umanu, formasaun, kapasitasaun pesoál, peskiza no hametin kapasidade institusionál.
Ba F-FDTL, planeamentu orsamentál importante atu asegura implementasaun programa no atividade sira tuir prioridade institusionál, ho apoiu rekursu ne’ebé adekuadu.
Alokasaun orsamentu ne’ebé planeia ho di’ak bele kontribui ba hadi’a prontidaun operasionál, profisionalizmu membru no dezenvolvimentu kapasidade institusionál F-FDTL.
Esforsu hirak-ne’e atu apoia misaun defeza soberania no integridade territóriu nasionál, tuir mandatu ne’ebé define iha lei.
Iha prosesu avaliasaun orsamentál, prioridade setoriál presiza konsidera objetivu estratéjiku, kapasidade ezekusaun programa no utilizasaun rekursu públiku ho efisiénsia.
Transparénsia, responsabilidade no prestasaun kontas mós sai prinsipiu importante atu asegura jestaun orsamentál ne’ebé responsável no orientadu ba rezultadu.
Audiénsia públika ne’e sai plataforma ba instituisaun sira atu hato’o proposta no nesesidade setoriál ba deputadu Parlamentu Nasionál, hodi apoia prosesu avaliasaun no deliberasaun OJE 2027.
Partisipasaun F-FDTL, Ministériu Defeza no instituisaun tuteladu sira reflete esforsu atu hametin kooperasaun institusionál ho Parlamentu Nasionál.
Kooperasaun ne’e importante atu apoia dezenvolvimentu kapasidade defeza nasionál no mantein soberania, independénsia no integridade territóriu Repúblika Demokrátika Timor-Leste.
(jen)
