DILI, STLTIMORLESTE.com – Komunidade ho kondisaun kbiit laek barak seidauk bele asesu ba programa Bolsa da Mae Kondisional no Saude Nutrisaun Inan no Oan (BdMK-Sanutrio), tanba falta dokumentus.
Xefe Suku Baboe Kraik, Postu Administrativu Atsabe, Luis Fernandes hatete, komunidade neebe ho kondisaun kbiit laek husi suku nee barak mak seidauk asesu ba programa BdMK-Sanutrio, tanba seidauk iha no trata dokumentu importante sira hanesan kartaun eleitoral, sertidaun RDTL no bilhete identidade. Tanba nee mak husi suku nee iha deit benefisiariu nain 33 mak asesu ba programa nee.
Nia katak, ba sira neebe seidauk asesu nee, nuudar autoridade lokal esforsu lori komunidade sira neebe seidauk asesu ba programa nee atu mai trata sira nia dokumentus iha balkaun Gleno nian.
“Komunidade ho kondisaun kbiit laek iha suku nee barak, maibe tanba deit sira balun laiha dokumentus nee mak sira nia naran la tama iha lista ba programa nee nian. Haree ba realidade moris povu barak mak ho kondisaun kbiit laek neebe presiza tulun no atensaun husi governu. Nee mak daudaun nee iha deit benefisiariu nain 33 mak asesu ba programa nee. Sira seluk neebe seidauk, ami ajuda lori sira mai trata iha balkaun Gleno nian, atu nunee sira mos bele asesu ba programa nee,” dehan nia ba STL liu husi telefone, Tersa (21/07/2026).
Komunidade Mertutu, Gleno, Paula Fernandes hatete, agradese ba governu tanba halo programa oi-oin hodi ajuda povu sira, liu-liu sira neebe kondisaun kbiit laek atu bele hetan no simu tulun husi governu kada fulan maske oituan no natoon deit maibe bele ajuda hodi sustenta ona duke laiha liu.
Nia dehan, neebe nuudar sidadaun no Timor oan tenke trata dokumentus sira atu nunee bele asesu ba programa governu nian hodi hetan ajuda no tulun husi estadu.
“Iha ami nia suku, hau nia familia no maluk balun mos asesu ba programa nee. Hau senti programa nee diak tebes ba ita Timor oan sira liu-liu ba inan no oan sira,” katak nia.
Nia hatutan, programa ida nee diak tanba atu hadia nutrisaun ba inan no oan liu husi apoiu alimentar, transferensia osan no asesu ba servisu saude nian.
Antes nee Prezidente Autoridade Munisipiu Ermera, Jose Martinho dos Santos Soares iha ambitu lansamentu programa nee iha Gleno hatete, benefisiariu husi Munisipiu Ermera nian rihun 4 resin. Maibe husi ida nee seidauk identifika hotu, dala ruma numeru nee bele sae tan.
(dom)
