BAUCAU, STLTIMORLESTE.com – Gaudencio Marques Figueiredo, ne’ebé ema barak koñese ho naran “Dede”, jornalista sénior ne’ebé antes servisu iha Média Suara Timor Lorosa’e (STL) no atualmente nu’udar editór sénior iha Média Independente, mate iha asidente tráfiku iha área Lanud, Suku Tirilolo, Postu Administrativu Baucau Vila, Munisípiu Baucau, iha kalan Tersa, 11 Novembru 2026.
Dede, ne’ebé besik ona to’o nia rezidénsia iha Aldeia Betulale, Suku Tirilolo, lakon nia vida iha momentu ne’ebé nia halo viajen husi Dili ba Baucau ho motor marka X-Ride, ho matríkula J.6837.
Jornalista sénior ne’e moris iha Bauro, Lospalos, loron 23 Juñu 1983, nu’udar kazadu no iha oan na’in haat. Nia mak jornalista ho esperiénsia, ne’ebé dedika nia an iha área komunikasaun no imprensa iha Timor-Leste.
Alende servisu nu’udar jornalista, Dede mós dosente iha Fakuldade Ciensias Sosiais, Departementu Komunikasaun Sosial, iha Universidade Nasionál Timor Lorosa’e (UNTL). Nia mós envolve an iha promosaun liberdade espresaun no liberdade imprensa, liuhusi organizasaun jornalista hanesan Timor-Leste Press Union (TLPU) no Asosiasaun Jornalista Timor-Leste (AJTL).
Asidente ne’e akontese bainhira Dede halo viajen husi Dili ba Baucau no besik ona to’o nia rezidénsia iha Betulale. Iha área Lanud, nia ho motor soke kareta kamioneta Fuso ho matríkula 56.533 ne’ebé para iha estrada públika Dili–Baucau tanba avaria, roda kuak.
Motorista kamioneta Fuso ne’e, Paulino Soares Guterres, esplika katak nia para iha estrada tanba problema roda no hela prepara atu kontinua viajen.
“Hau mai husi Dili. Hau nia roda kuak, hau sobu to’o pasang hotu fali. Hau atu aranka, sa’e ba kareta laran halo moris tiha atu aranka. Seidauk aranka, rona tarutu tiha iha kotuk. Hau hanoin hau nia roda kuak fali, ne’ebé hau tun fali hare’e motor iha tiha okos,” motorista Paulino Soares Guterres haktuir ba jornalista sira iha edifísiu Komandu Polísia Munisípiu Baucau, Kinta (12/11/2026).
Paulino, konta katak hafoin haree asidente, nia hamutuk ho komunidade sira halo esforsu atu fó tulun ba vítima. Maibé, vítima hakotu ona iis iha fatin akontesimentu.
Aliende ne’e Komandu Polísia Munisípiu Baucau, liuhusi Seksaun Tránzitu, dereitamente to’o kedas iha fatin akontesimentu rekolla informasaun no halo identifikasaun inklui transporta vítima ba mortuáriu Hospitál Rejionál Eduardo Ximenes (HoREX), antes translada ba rezidénsia família nian iha Betulale, Tirilolo.
“Hau hamutuk ho parte Polísia mai kedas Komandu. Hau hein de’it família ko’alia oinsá,” Paulino Soares Guterres akresenta.
Paulino afirma katak nia prontu atu koopera ho prosesu justisa no respeita desizaun ne’ebé família foti.
Liga ho asidente ne’e, STL tenta atu hetan konfirmasaun husi Komando Polísia Munisípiu Baucau, maibé to’o agora seidauk hetan komentáriu ofisiál.
Atualmente, vítima nia isin mate sei hela iha rezidénsia família nian iha Betulale, Tirilolo, atu hein família prinsipál antes translada ba nia rai moris fatin iha Aldeia Sepelata, Suku Bauro, Postu Administrativu Lospalos, Munisípiu Lautém.
Entretantu, kareta Fuso no motorizada ne’ebé envolve iha asidente ne’e, Komandu Polísia Munisípiu Baucau liuhusi Seksaun Tránzitu asegura ona atu kontinua prosesu investigasaun.
(tom)
