DILI, STLTIMORLESTE.com – Xefe Estadu Maiór Jenerál FALINTIL-Forsa Defesa Timor Leste (F-FDTL), Tenente Jenerál Domingos Raúl “Falur Rate Laek” senti triste tanba lakon tan membru F-FDTL ida ho naran Saudozu Primeiro Sergento, Joanico de Araújo.
Tenente Jeneral nee simu ona informasaun katak, Primeiru Sergento Joanico de Araújo, nia tama Militar nee 2001 konsege kleur ona iha Instutisaun F-FDTL, maibe dadersan nee rona katak mota mak lori no lakon vida.
“Hau rona dehan mota mak lori, maibe nia mos moras oituan, hanoin ladun diak, mais nia hemu tua oituan lanu, maibe hau seidauk hatene lo-loos nia kazu, mais mota mak lori, ita tristi tanba F-FDTL lakon nia membru ida tan, nia uluk ema rezistensia ninia, no ema subrevivente masakre, uluk Indonezia halo Ermera, entaun nia trauma ho ida nee, nia tauk ba ida nee, tanba nee ami kuidadu tebes nia, mais nia jeitu mak hemu tua nee,” Xefe Estadu Maiór Jenerál FALINTIL-Forsa Defesa Timor Leste (F-FDTL), Tenente Jenerál Domingos Raúl “Falur Rate Laek” ba jornalista sira iha serimónia aniversáriu PCIC iha salaun Multiuso GMN, Kinta (14/05/2026).
Nia esplika, Saudozu Primeiro Sergento Joanico de Araújo ninia avaliasaun dezempenhu nee diak nomos nia mantein pozisaun hanesan sidadaun neebe diak.
Entretantu Saudozu Primeiro Sargento Joanico de Araújo hahu tama bá Instituisaun F-FDTL iha tinan 2001 no durante nia servisu halao knaar iha Forsa Apoiu Jeral Metinaro, liu-liu iha Unidade Apoiu Servisu (UAS).
Tanba nee Komando F-FDTL hatoo sentimentu laran moras no konsiderasaun aas bá família no kolega servisu sira neebe husik hela.
Saudozu Primeiro Sargento Joanico de Araújo orijin husi Munisípiu Ainaro, Postu Administrativu Hatu Builico, Suku Nunu Mogue.
(jen)
