DILI, STLTIMORLESTE.com – Tinan nee Fundu Dezenvolvimentu Kapital Humanu (FDCH – sigla português) fo bolsu estudu ba Timoroan hamutuk 372 ba lisensiatura, mestradu no doutoramentu.
“Iha 372 bolsu por meritu, maibe seim posoas nee ba melhores kualifikadu husi eskola sira, ita iha eskola sekundariu jeral no ensinu tekniku vokasional nee hamutuk 179, nomos eskola cafe maizumenus iha sentu 83, maibe orsamentu neebe preve ba bolsu estudu ba melores kualifikadu iha tinan ida nee seim pesoas, entaun ami fahe seim pesoas nee ba area prioridade governu nian mak hanesan area saude, enjenharia, agrikultura, edukasaun, hospitalidade, turizmu,” dehan Diretor Ezekutvu FDCH, Julio Aparicio ba jornalista sira iha salaun Delta Nova, Komoro, Tersa nee (21/01/2025).
Nia dehan, sira koko seim pesoas nee ba iha area hirak neebe bele responde IX Governu nian area prioridade sira, maibe atu koloka estudantes sira nee sei koordena ho linha ministerial sira, ba Ministeriu sira hotu, bainhira haruka ema hirak nee ba, kuandu sira fila mai tenke servisu ho Governu, primeiru sira tenke kontribui uluk ba estadu, minimu tinan 5, depende orsamentu estadu gasta ba sira, maibe ida nee regras no prosedimentu FDCH nian, no desizaun mai husi Governu.
“Sira nee maioria ba iha Malazia, Tailandia, Brazil, Portugal no Indonezia, husi 372 nee iha nivel doutoramentu, lisensiatura no mestradu, atu aranka nee depende ba kada ano letivu nasaun idak-idak nian, tanba nee mak prosesu selesaun ami sei komesa iha fulan Fevereiru no Marsu. Orsamentu koloka ba bolsu estudu iha tinan ida nee maizumenus 13 milhoens,” hatete nia.
Nia hatutan, ba lisensiatura tinan 4, mestradu tinan 2, ba iha ano preparatoriu ba lisensiatura depende ba kursu, tanba kursu neebe sira ba direita nomos sira servisu hamutuk ho universidade sira, hodi nunee koordena nafatin.
Nunee mos Ministru Planeamentu no Estratejiku (MPIE), Gastão de Sousa hatete, tinan nee atribui bolsu estudu ba Timoroan sira, liu-liu ba iha area neebe mak tau prioridade liu, hodi haree ba iha diploma ministerial neebe mak iha.
(jac)