LAUTÉM, STLTIMORLESTE.com – Festival Fronteira 2026 sai oportunidade ba família sira iha Timor-Leste no Nusa Tenggara Timur (NTT) hanesan Atambua, Kefa, Malaka no Kupang inklui Provinsia Maluku Barat Indonézia atu hasoru malu depois separadu kleur tanba distánsia jeográfika no situasaun istórika.
Manuel da Silva, membru família uma lisan Lakoda husi Suku Buruma, Postu Administrativu Baucau Vila, Munisípiu Baucau hato’o agradese ba Governu Timor-Leste tanba organiza festival ne’e, ne’ebé fó oportunidade ba nia atu hasoru malu ho nia maun nia oan sira husi Kisar, Indonézia.
“Momentu ida hanesan ne’e halo hau orgullu tebes, tanba hau nia maun mai iha Com. Foin primeira vez hau bele hasoru fali nia,” Manuel da Silva hateten ba STL, iha margem Festival Fronteira 2026, iha Suku Com, Kinta (22/10/2026).
Nia esplika katak família sira ne’ebé hela iha Kisar durante tempu naruk la hasoru malu. Tanba ne’e, festival ne’e sai oportunidade importante atu hametin relasaun familiár, aumenta koñesimentu malu no haburas komunikasaun entre jerasaun sira.
Iha parte seluk, José Paulo da Silva, aman husi Manuel, mós hato’o agradese ba Governu Timor-Leste tanba konvida sidadaun sira husi Kisar atu partisipa iha festival ne’e.
Tuir nia, festival ne’e la’ós de’it promove interkámbiu kulturál no rekonsiliasaun entre Timor-Leste no Indonézia, maibé mós fó oportunidade ba família sira ne’ebé iha ligasaun istórika atu hasoru malu fali.
“Família ne’ebé mai ne’e mak hau nia maun nia oan. Hau nia maun mak kaben ho feto iha ne’ebá. Maibé durante ne’e sira la mai, agora mak hau nia oan ne’e atu mai,” José Paulo da Silva hateten.
José Paulo konta katak nia maun forma família iha Kisar durante períodu kolonizasaun Portugés no Olandés, maibé nia maun mate ona. Tanba ne’e, enkontru iha Festival Fronteira 2026 iha Com iha signifikadu espesiál ba família, tanba fó oportunidade atu hametin fali ligasaun familiár ne’ebé kleur ona separadu.
Nia mós informa katak, tuir informasaun ne’ebé nia simu, família uma lisan Lakoda ne’ebé hela iha Kisar, Indonézia, hamutuk ema na’in 21. Maibé, nia seidauk hatene ho loloos ema hira mak mai partisipa iha festival ne’e.
“Sira ne’e na’in hira mak mai, hau la hatene, tanba ami hela dook malu. Maibé informasaun ne’ebé hau hetan mak husi hau nia oan ne’ebé uluk ba vizita sira dala ida,” José Paulo hateten.
Tuir observasaun STL nian iha fatin, sidadaun Indonézia husi Kisar ne’ebé iha ligasaun familiár ho sidadaun Timor-Leste to’o ona iha Portu Com, liuhusi transporte tasi, atu partisipa iha Festival Fronteira 2026.
Maibé, to’o notísia ne’e prepara, STL seidauk hetan komentáriu direta husi membru família uma lisan Lakoda ne’ebé mai husi Kisar, tanba sira sei iha prosesu akomodasaun iha fatin eventu.
Festival Fronteira 2026 hala’o iha Suku Com, Munisípiu Lautém, husi loron 23 to’o 25 Outubru, ho objetivu atu promove interkámbiu kulturál, hametin rekonsiliasaun no aproxima komunidade sira husi Timor-Leste no Nusa Tenggara Timur (NTT), Indonézia.
Festival ne’e mós sai espasu ba família sira ne’ebé iha ligasaun istórika no kulturál entre fronteira atu hasoru malu, troka esperiénsia no hametin relasaun ne’ebé liga sira durante jerasaun barak.
(tom)
