LAUTÉM, STLTIMORLESTE.com – Governu Timor-Leste lansa Festival Fronteira Internasionál 2026 iha Suku Com, Postu Administrativu Lautém, Munisípiu Lautém, ho objetivu promove interkámbiu kulturál, hametin rekonsiliasaun no haforsa relasaun entre komunidade sira iha Timor-Leste no Nusa Tenggara Timur (NTT), Indonézia.
Reprezenta Governu, Sekretáriu Estadu Arte no Kultura, Jorge Soares Cristavão, esplika katak antes atividade festival hahú, Governu hamutuk ho Autoridade Munisipál, autoridade lokál no lia-na’in sira iha Suku Com realiza ona serimónia rituál tradisionál atu fó matak malirin no fó benvindu ba bainaka sira ne’ebé mai husi NTT no husi Munisípiu seluk.
“Agora ita-nia konvidadu sira husi Autoridade NTT tama ona liuhusi fronteira. Oras tuirmai, kalan sei iha jantár hamutuk ho Primeiru-Ministru no partisipante sira hotu,”v hateten SEAK Jorge Soares Cristavão ba jornalista sira iha fatin eventu Com hafoin remata seremonia ritual, Kinta (22/10/2026).
Nia esplika katak Festival Fronteira la’ós de’it atividade ne’ebé liga ba arte no kultura, maibé mós sai plataforma atu promove ekonomia, liuliu liuhusi inisiativa no politika ekonomia azul.
Nia hatutan katak, festival ne’e sei inklui feira atu hatudu produtu, kultura no potensiál lokál, no Gabinete Ekonomia Azul sei rejista festival ne’e nu’udar parte husi inisiativa ne’ebé liga kultura ho dezenvolvimentu ekonómiku.
“Festival Fronteira ne’e la’ós ko’alia de’it kona-ba arte no kultura, maibé ita ko’alia mós kona-ba diálogu entre joven sira husi Liran Kisar no komunidade sira iha área fronteira. Tanba ne’e, ita presiza asegura nafatin ligasaun entre komunidade sira, liuliu iha fronteira tasi,” nia dehan.
Tuir Sekretáriu Estadu ne’e, festival sei kontinua ho semináriu ne’ebé Primeiru-Ministru sei sai oradór prinsipál, no sei loke ofisialmente eventu ne’e.
Jorge Soares Cristavão mós informa katak, partisipante sira husi NTT ne’ebé atu partisipa iha eventu festival ne’e liu nain 100 kompostu husi Autoridade, komunidade no joven sira, ne’ebé sei aprezenta sira-nia arte no kultura hamutuk ho joven sira husi Díli no Munisípiu Lautém.
Nia enfatiza katak interkámbiu ne’e importante tanba joven balu husi NTT mai husi família ne’ebé iha inan-aman Timoroan, nune’e kultura no istória komunidade sira iha área fronteira kontinua iha ligasaun.
“Objetivu ida ne’e mak atu kontinua ko’alia malu entre joven sira, hametin dame no estabilidade iha área fronteira marítima,” nia afirma.
Aprosimasaun kulturál sai dalan ba dame
Iha fatin hanesan, Prezidente Autoridade Munisípiu Lautém, Melio de Jesus, dehan katak Festival Fronteira iha importánsia boot atu aproxima komunidade sira liuhusi kultura no kontinua prosesu rekonsiliasaun ne’ebé Timor-Leste hahú ona.
“Festival ne’e importante, tanba uluk ita-nia beiala sira sempre rezolve problema sira tuir dalan kultura nian. Tanba ne’e, hau sente orgullu tebes ba inisiativa Sekretáriu Estadu Arte no Kultura ne’ebé uza mekanizmu kulturál iha Festival Fronteira,” Melio de Jesus dehan.
Nia hato’o esperansa katak festival ne’e sei fó impaktu pozitivu ba konstrusaun Estadu, dezenvolvimentu nasionál no hametin unidade entre komunidade sira iha área fronteira.
Festival Fronteira Internasionál 2026 sei hala’o husi loron 23 to’o 25 Outubru, iha Suku Com, Munisípiu Lautém, ho partisipasaun husi delegasaun Timor-Leste no NTT, Indonézia, liuhusi atividade kulturál, semináriu, diálogu no feira.
(tom)
