DILI, STLTIMORLESTE.com – Feto presiza melhora servisu iha area saida deit, hodi hatudu ba ema hotu katak, feto bele sai inspirasaun no bele mos sai lideransa iha kualker atividade.
Kestaun nee hatoo husi feto potensial Merlinda Soares ba STL iha nia knaar fatin Timor Plaza, Kinta (06/02/2025).
Nia husu ba feto iha Timor laran tomak kontinua luta ba oin hodi partisipa iha prosesu dezenvolvimentu nasional tuir mehi neebe feto sira idak-idak iha.
“Mensajen ba iha feto sira atu bele kontinua luta ba oin atu partisipa iha prosesu Dezenvolvimentu Nasional, mensajen ba feto maluk sira atu nafatin melhora ita nia servisu iha area saida deit, hatudu ba ema hotu katak feto mos bele atu sai inspirasaun ba joven feto maluk sira seluk, hatudu katak feto sira mos bele sai lideransa ba futuru iha Governu, empreza publiku no instituisaun seluk,” katak nia.
Nia hatutan, feto persiza hasae kapasidade investe ba sira nia aan rasik, nunee bele atinji mehi sira.
No husu ba iha juventude sira atu hadook aan husi hahalok krimi sira, tanba joven mak futuru nasaun nia.
“Mensajen ba joven sira, tanba joven sira mak futuru nasaun, husu joven sira hapara ona buat sira neebe laiha vantajen ba imi, hamriik luta ba imi nia moris neebe diak liu husi investe imi nia aan husi eskola, esforsu a’an hodi ba hetan edukasaun neebe diak, tamba Timor presiza imi no imi mak rekursu ba dezenvolvimentu Timor Leste,” dehan nia.
Nunee mos Akademista Brigida Antonia Correia hatoo mensajen ba juventude Timorense katak, fiar aan nafatin, buka haburas matenek iha imi nia aan rasik.
“Tanba ho matenek mak ita bele dezenvolve ita nia rai doben Timor Leste. Ema barak sofre, mate, luta ba ukun aan, maibe ita neebe sei moris agora nee mak tenke dezenvolve ita nia rai, hanesan mehi neebe ita nia Saudozu sira entrega hela mai ita jerasaun kontinuadora. Tenke fiar aan nafatin. Joven mak esperansa ba rai doben Timor Leste,” katak nia.
(eme)
