DILI, STLTIMORLESTE.com – Fiár no domin tenki lakan nafatin iha ema nia fuan, maski iha tempu sira ne’ebé Maromak nia mai parese tarde ka la tuir ema nia espetativa. Mensajen ne’e bazeia ba Evanjellu tuir Mateus 25:1-13, kona-ba feto virjen sanulu ne’ebé hein noivu.
Padre Paul Kerans, SVD ba STL Sesta (28/08/2026) hatete, iha ai-knanoik ne’e, feto virjen matenek sira prepara mina natoon atu sira-nia ahi-oan bele lakan nafatin, enkuantu feto virjen beik sira la prepara mina natoon. Bainhira rona liafuan, “Noivu to’o ona! Sai ba hasoru nia,” sira ne’ebé prontu sai atu hasoru noivu.
Pe. Paul Kerans, SVD, iha nia reflesaun hatete katak noivu reprezenta Na’i Jesus, ne’ebé mai hasoru nia povu no hafoun aliansa ho sira.
Tuir nia, ema ida-idak loroloron hetan konvite atu simu Na’i iha nia moris, inklui iha tempu bainhira Na’i mai iha maneira ka tempu ne’ebé ema la espera.
Pe. Paul salienta katak fiar-na’in sira presiza mantein fiar no domin hanesan ahi-oan ne’ebé lakan iha nakukun. Maski Maromak parese dook ka la iha, ita tenki nafatin fiar no hein ho pasiénsia.
“Maromak iha ne’e ba ita, no Nia husu ita atu iha ne’ebá ba Nia, hanesan virjen matenek sira,” dehan Pe. Paul Kerans.
Nia mós fó hanoin katak ema bele hetan tentasaun atu rende bainhira espera kleur, maibé Maromak nunka rende ba ema. Nia nafatin fiel no hein ita-nia fidelidade.
“Maromak nunka rende ba ita; Nia fiel ba ita, to’o rohan, no Nia hein fidelidade hanesan husi ita,” afirma Pe. Paul.
Evanjellu ne’e, nune’e, konvida fiar-na’in sira atu mantein fiar no domin lakan nafatin, hodi prontu atu hasoru Na’i iha tempu ne’ebé Nia mai.
(eme)
