DILI, STLTIMORLESTE.com – Eskola Sekundariu Jeral (ESJ) FINANTIL husu apoiu profesores ba disiplina neebe too agora seidauk iha professores.
Asuntu nee hatoo husi Diretor Eskola Sekundariu Jeral FINANTIL, Aniceto Berlelo ba STL iha nia knaar fatin Aimutin, Kuarta nee (05/08/2026).
“Hau hanoin konaba profesores, Eskola FINANTIL sei presiza tan, tanba menus profesores ba materia tetum, portugues, englesh no desportu, ba materia ida nee mak ami sei presiza tan profesores, tanba profesor balun reforma ona, liu-liu ba materia português ninian, tanba nee ita presiza tan ba materia ida nee,” nia dehan.
Nia afirma, tanba materia desportu iha nee laiha, iha nee profesores neebe iha espriensia nee mak hanorin iha nee, ba profesores neebe espesialidade tuir edukasaun nee katak, ema neebe atu hanorin nee tenke tuir duni iha area espesialidade ninia.
“Nee husi edukasaun hatene ona, tanba ami halo ona pedidu konaba profesores neebe mak menus iha eskola FINANTIL, total profesores 79, estudantes mil quarenta um, sala aprenduzajen hamutuk 18, fahe ba turnu rua, dader no loraik,” nia dehan.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes dehan, eskola menus profesores nee mak Ministeriu Edukasaun rekonhese katak, sei menus profesores ba disiplina português, ho desportu, nomos iha materia exata balun, tanba ME foin daudaun loke hela vaga, maibe português nee ema mak ladun mai aplay vaga ida nee, maibe too tempu ida sira sei bele kompletu ba profesores neebe mak too ohin loron sei menus profesores.
“Ho profesores menus iha ita nian eskola sira, nee mak ministériu rekruta vaga, maibe ema neebe mak aplay ba vaga português nee minimu tebes, nomos iha desportu ninia mos hanesan ema minimu tebes. Los duni katak, ita sei menus profesores ba area neebe mak ohin hau mensiona nee, espera ba oin ema bele mai aplay vaga ida nee, atu nunee ita bele koloka ba ita nian eskola sira nee,” nia dehan.
Benjamin dehan, ministeriu nafatin loke vaga ba profesores iha lingua português no ba disiplina seluk tan, neebe too ohin loron eskola balun sei menus, bainhira ema ruma mai aplay vaga nee, nunee ministeriu bele koloka ema hirak nee atu fasilita estudantes sira iha prosesu ensinu aprendizajen ninia.
(jac)
