DILI, STLTIMORLESTE.com – Fundasaun Mahein (FM) husu halo investigasaun klean ba bala musan neebe sidadaun Timoroan ida lori husi Indonezia mai Timor Leste (TL), tanba ida nee problema kriminal no problema konvensional ho kilat.
“Bala musan neebe ita nia sidadaun lori tama mai iha ita nia rai presiza investigasaun klean husi instituisaun relevante, atu ita bele hatene bala musan nee nia foti husi neebe, lori tama atu halo saida, presiza investigasaun mak ita foin hatene,” hatete Diretor Ezekutivu Fundasaun Mahein (FM), Nelson Belo ba jornalista sira, iha FM, Dili, Kinta (16/1/2025).
Nia dehan, iha linha fronteira nuudar asuntu neebe boot, tanba sistema integradu neebe mak laos husi Ministeriu Interior (MI) deit, maibe husi Ministeriu sira seluk mos destaka iha fronteira, tanba Timor Leste nia fronteira luan tebes.
“Ita nia problema iha fronteira komplexu, tuir Fundasaun Mahein nia monitorizasaun ba problema neebe akontese iha fronteira, ida nee problema kriminal, problema konvensional ho kilat,” nia esplika.
Diretor FM nee husu PNTL atu halo investigasaun klean ba krimi sira nee, tanba bele fo ameasa ba indisiu seguransa nasional.
Maibe atu halo prevensaun iha fronteira UPF no TNI tenke patrulha ho kordenada tanba krimi organizadu matenek liu, sempre hakur beibeik husi fronteira rua nee.
Iha fatin hanesan, Komandante Jeral Polisia Nasional Timor Leste (PNTL), Komisariu Jeral Polisia, Henrique da Costa informa, prosesu ba kazu ema deskonhesidu tiru rezidensia eis Prezidente Republika, Lú Olo nee laos kazu baibain, tanba nee PNTL persiza apoiu husi parseiru sira para hodi bele halo teste ba kilat musan neebe ema uza tiru sae depois tun kona uma.
“PNTL iha ona komunikasaun ba parseriu sira husi Austrália nian, para bele ajuda ita halo teste ba kilat musan iha laboratorium,” dehan nia.
(jen)