AMBENO, STLTIMORLESTE.com – Fatin Tratamentu Saude (FTS) Bairu Tael Iu, Aldeia Mahata, Suku Kutete, rejistu kazu iInfesaun Respiratoriu aas (ISPA), tuir mai mak Diarea, isin katar no matan moras maibe ladun barak.
Informasaun nee hatoo husi Lucia Felisiano da Conceição nuudar Koordenador FTS Bairu Tael Iu, Aldeia Mahata, Suku Kutete, Postu Administrativu Pantemakassar, Rejiaun Administrativa Espesial Oecusse-Ambeno (RAEOA), Tersa (07/07/2026) katak, iha fatin tratamentu Saude iha Bairru Tael Iu, rejistu kazu barak liu maka moras ISPA, alende ida nee, moras Diarea, Isin Katar no matan moras maibe ladun barak.
“Iha FTS Tael Iu, Aldeia Mahata, ami loron-loron simu pasiente neebe maka mai halo tratamentu saude, rejistu kazu makaas liu maka moras ISPA, kazu sira seluk hanesan Diarea, isin katar, matan moras iha duni maibe numeru ladun barak. Ba inan feto sira neebe maka isin rua, ami fasilita sira no refere sira ba direitamente iha Sentru Saude Kiumaonteko, Suku Costa nian, maibe kazu kiik sempre ami mak atende,” dehan Lucia Felisiano da Conceição.
Nia haktuir tan katak, kada loron pasiente neebe maka mai halo tratamentu saude iha FTS nee, 20 ba leten neebe kada fulan pasiente neebe mai tratamentu saude iha nee too 300.
“Ami mos iha programa vizita komunidade tama sai uma iha Aldeia Mahata, ba too Bairru izoladu ida iha Upmetan, dok husi Estrada publiku iha raihun fronteira ho Suku Nipane nian, neebe ami too neeba mos fo atendementu ba komunidade suku Kutete ho Nipane, sempre halo promosaun ba fasilidade saude neebe governu instala iha komunidade nia leet hodi nunee povu sente saude la premite karik, bele hakbesik ba fasilidade saude neebe maka besik, tanba iha Suku Kutete iha Postu Saude ida neebe harii iha Aldeia Kutete, no FTS nee maka harii iha Bairru Tael Iu, aldeia Mahata,” afirma nia.
Nia haktuir tan katak, alende vizita komunidade, halo mos mobile klinika, Siska, halo mos promosaun saude nian atu nunee povu hakbesik ho fasilidade saude tanba iha nee, halo mos imunizasaun ba labarik sira. Total pesoal saude neebe maka fo tratamentu saude iha Bairru Tael Iu, aldeia Mahata ida nee hamutuk ema nain 7, kompostu husi infermeiru nain 1, Asistente Infermeiru nain 1, tekniku administrasaun nain 1, ho seguransa nain 2 no Cleaning Service nee ema nain 2.
Iha fatin hanesan, Pasiente Maria Colo dehan, ho prezensa FTS iha Aldeia Mahata ida nee, hakbesik ona povu atu hetan tratamentu Saude, tanba antes nee tenke ba halo tratamentu saude dok tebes iha Sentru Saude Kiumaonteko iha Suku Costa, Aldeia Sanane.
“Ami nuudar povu Aldeia Mahata, agradese ba governu Autoridade RAEOA neebe instala Fatin Tratamentu Saude ida iha Ami nia Aldeia ida nee, hodi hafasil ami hetan tratamentu saude, tanba antes nee, kuandu halo tratamentu Saude, sempre ba too Sentru Saude Kiumaonteko, ida nee dok teb-tebes,” dehan nia.
Nunee mos Marsel Elu hatoo agradesimentu ba governu liu husi Serbisu Saude Oecusse neebe tau FTS ida iha Bairru ida nee, agora hetan tratamentu saude, lao ain deit too ona fatin ida nee, hodi hetan asistensia mediku husi pesoal saude sira.
(jos)
