DILI, STLTIMORLESTE.com — Federasaun Voleibol Timor-Leste (FVTL) prontu atu organiza no diriji modalidade voleibol iha Festival Nasional Desportu (FND) 2026, ne’ebé sei hala’o husi 12 to’o 29 Novembru.
Prezidente Federasaun Voleibol Timor-Leste, Inocêncio Araújo da Silva, hateten katak federasaun prepara ona árbitru no ekipa téknika atu asegura kompetisaun voleibol lao ho di’ak.
“Federasaun Voleibol Timor-Leste prontu atu organiza no diriji eventu Festival Nasional Desportu, liuliu iha modalidade voleibol. Ita prepara ita-nia árbitru no ekipa téknika sira hodi halo eventu ida-ne’e sai eventu ne’ebé di’ak liu,” Inocêncio hateten ba jornalista STL, iha ninia fatin servisu, Kuarta-feira, 14/10/2026.
Nia esplika katak tuir planu Ministériu Juventude, Desportu, Arte no Kultura (MJDAC), Festival Nasional Desportu sei hahú iha 12 Novembru no taka iha 29 Novembru 2026.
Inocêncio hatutan katak festival tinan ida-ne’e sei presiza tempu naruk liu tanba modalidade desportiva ne’ebé sei kompete aumenta kompara ho edisaun sira antes.
“Tuir ita-nia haree, festival tinan hirak liu ba iha modalidade tolu ka haat de’it, maibé agora modalidade sira aumenta to’o besik sanulu resin. Tanba ne’e, atividade sira iha eventu ida-ne’e sei presiza tempu barak,” nia afirma.
Iha parte seluk, Prezidente Komité Paralímpiku Nasionál Timor-Leste, Mateus Lucas, hateten katak atleta paralímpiku sira mós sei partisipa iha Festival Nasional Desportu 2026.
Nia hateten katak, kompetisaun paralímpiku sei inklui modalidade hamutuk hitu, inklui atletismu, ténis meja, ténis kampu no badminton, ho modalidade seluk tan.
Partisipasaun atleta paralímpiku sira iha festival ne’e konsidera nu’udar oportunidade atu fó espasu ba atleta ho defisiénsia sira atu hatudu sira-nia kapasidade no dezenvolve desportu paralímpiku iha Timor-Leste.
(leo)
