DILI, STLTIMORLESTE.com – Gabinete Apoiu Tekniku (GAT) ho Fornesedor husi Ensinu Baziku Central (EBC), Manleuana partisipa ona formasaun durante loron rua husi ME no WFP.
Lia hirak nee hatoo husi Gabinete Apoiu Tekniku (GAT), EBC Manleuana, Narcisio P. S. V. da Costa ba STL iha nia knaar fatin, Kuarta nee (08/07/2026).
“Foin daudaun nee ami tuir formasaun, primeiru nee husi WFP, sira koalia konaba alimentasaun ai-haan sira neebe mak atu uza ba iha merenda eskolar, atu nunee bele hasae nutrisaun labarik sira nian, nee duni formasaun nee koalia liu konaba merenda eskolar, liu-liu ba iha ai-haan lokal sira nee, neebe mak iha ita nia rai laran, ami tuir formasaun durante loron rua. Formador neebe fo formasaun ba ami nee husi WFP hamutuk ho ME liu husi Edukasaun Dili,” tenik nia.
Nia dehan, sira tuir formasaun durante loron rua koalia konaba ai-haan, no menu hirak neebe mak atu prepara ba estudantes sira nomos iha planu ba tinan oin, merenda eskolar bele lao diak liu tan, tanba sira atu aplika, tanba tuir lo-loos tuir menu neebe iha, sira hakarak atu sukar ou tetu menu, ezemplu etu tetu ho nia grama, inklui modo tetu ho nia grama, naan ho aifuan sira, ho nunee bele fo nutrisaun neebe diak ba estudantes sira.
“Depois halo pratika alimentasaun hanesan tein amostra ai-haan lokal sira nee, depois sira hatudu ai-haan lokal sira nee, depois mak sira halo pratika tein, ami observa haree ho matan, depois sira tetu dasin nee, tetu nee ninia grama hira, hanesan naan, aifuan sira nee, sira kompara aifuan neebe diak liu ba ita nian estudantes sira, fore mungu nee sira bandu labele halo ho susu enak,” katak nia.
Nia akresenta, iha formasaun nee koalia konaba menu neebe uza iha loron Sesta nee nuu-been, gula mera, lakeru tasak, maibe iha loron hirak liu ba sira halo ida nee, estudantes balun mak han, balun lakohi han, tanba dehan ladun midar, nee duni oinsa mantein nafatin menu neebe mak iha, evita buat midar sira nee para hadok aan husi moras raan midar.
Nunee mos Diretor EBC Manleuana, Carlos Correia katak, foin daudaun nee sai fali Q2 nian, nee duni merenda eskolar lao diak ona hanesan baibain, estudantes hamutuk 1.972 mak asesu ona ba iha programa merenda eskolar.
“Menu nee ita uza nafatin, maibe foin daudaun nee GAT ho fornesedor sira ba tuir formasaun, neebe sei iha mundansa, maibe GAT, fornesedor nomos kordenador filial sira partisipa ona iha formasaun,” nia esplika.
(jac)
