DILI, STLTIMORLESTE.com – Governu liu husi reuniaun Konselhu Ministru (KM) aprova projetu Rezolusaun Governu, neebe aprezenta husi Ministru Asuntu Kombatente Libertasaun Nasional, Gil da Costa Monteiro “Oan Soru”, kona-ba implementasaun medidas legal rejistu dadus kombatente no martir sira libertasaun nasional nian, neebe rezulta husi publikasaun avizu rejistu daruak 2009.
Liu husi reuniaun KM, Kinta (30/01/2025), iha Palasiu Governu, hodi aprova rezolusaun nee, no rezolusaun ida nee Governu reafirma ninia apoiu inkondisional ba Ministeriu Asuntu Kombatentes Libertasaun Nasional, iha implementasaun medidas hotu-hotu relasiona ho publikasaun avizu rejistu 2009 nian, tuir termu sira neebé estabelese ona iha Estatutu Kombatentes Libertasaun Nasional nian, neebé aprova ona husi. Lei n. 3/2006, loron 12 fulan Abril, altera husi Lei nu. 9/2009, loron 29 fulan Julhu, Lei n.2/2011, loron 23 fulan Marsu no Lei n.3/2024, loron 12 fulan Junhu.
“Governu iha no sei komprometidu nafatin atu garante katak, prosesu tomak rejistu dadus kona-ba kombatente libertasaun nasionál nian halao ho forma integral no bazeia eskluzivamente ba lei, hodi garante kombatente hotu-hotu nia direitu”, haktuir Komunikadu neebe STL asesu, Kinta (30/01/2025).
Komunikadu nee dehan, tuir termu Estatutu Kombatentes Libertasaun Nasional nian, karik laiha konkordansia ho dadus neebe publika ona, interesadu sira iha direitu atu aprezenta reklamasaun ho provas neebe fundamentadu, individualmente, iha prazu loron 60 hahu husi data publikasaun avizu nee. Ema neebe halo deklarasaun falsu ka fo informasaun falsu, ka falsifika dokumentu relasiona ho prova militansia iha luta libertasaun nasional ho intensaun atu hetan direitu neebe konsagra iha Estatutu Kombatente Libertasaun Nasional, sei hetan kastigu tuir lei haruka.
(gui)