DILI, STLTIMORLESTE.com – Governu liu husi Sekretariu Estadu ba Igualdade halo esforsu makas oinsa kria lei, hodi halo prevensaun ba asediu seksual ba trabalhador sira iha servisu fatin no fo protesaun ba trabalhador domestika sira.
Kestaun nee hatoo husi Sekretaria Estadu ba Igualdade (SEI), Elvina Sousa Carvalho ba jornalista sira iha Salaun Delta Nova, Segunda 909/12/2024).
“Hau hanoin nee problema ida importante, ita bele koalia assuntu nee, ezemplu asediu seksual iha servisu fatin ba feto no maluk vulneravel sira, no Advokasia neebe mak SEI fo ho SEFOPE halo mak agora iha hela esforsu makaas atu bele kria lei, ou halo lei ida ba trabalhador domestika ida atu bele proteje nomos kria lei servisu neebe dignu no fo protesaun ba trabalhador domestika sira, ida nee esforsu neebe mak lao hela, draf mos iha ona, hein deit etapa ikus presiza diskusaun ida klean antes lori ba Konselhu Ministru hodi hetan aprovasaun,” dehan SEI, Elvina.
Nia hatete, problema durante nee eziste duni, tanba nee mak presiza kria lei ruma, nunee bele rezolve problema asediu seksual neebe mak akontese iha servisu fatin nee, ida nee problema neebe mak seriu liga ho direitu feto nia.
Iha parte ketak, Sekretaria Jeral KSTL, Elisihabet Nino Araújo hatete, objetivu husi audensia neebe mak KSTL halo ho komisaun D atu koalia konaba, ratifikasaun konvensaun 190 elimina asedu ba trabalhador iha mundu trabalhu Ratifikasaun konvensaun nee, hahu iha tinan 2019 too agora iha nasaun hamutuk 39 mak ratifika ona, no iha 2021 KSTL halo ona kampanha no seminariu ho komunidade sira kona-ba oinsa atu elemina asedu ba trabalhador sira iha servisu fatin.
Nia dehan, KSTL iha Timor laos deit kazu 19 deit, maibe iha barak, maibe ema sei moe hela atu hatete tanba refere fali ba ema nia privasidade rasik iha nia aan, tanba nee tempu ba tempu halo kampanha nafatin no se ratifikasaun nee halo ema komesa sente seguru, no ekipa KSTL sei forma ekipa bainhira hetan vítima asedu iha servisu fatin sira hatene ona atu ba neebe.
Timor Leste presiza ratifika tanba kestaun violensia asedu hasoru trabalhador iha mundu trabalhu nee barak laiha protesaun legal ida atu nunee ema sente katak, bainhira hatoo hanesan vítima sente seguru no la lakon servisu.
Nunee mos tuir Prezidente Rede Feto, Zelia Fernandes hatete, presiza halo prevensaun asediu seksual iha servisu fatin.
Nia hatutan presiza kria lei ruma hodi bele garante trabalhador domestika sira nia direitu nunee bele serbisu ho dignu no hadook aan husi asedu seksual iha servisu fatin.
(eme)
