DILI, STLTIMORLESTE.com – Ministru Justisa (MJ), Sergio Hornai hatete, kona-ba prosesu estradisaun ba sidadaun Filipina Arnolfo Teves Jr, Governu iha ona desizaun propriu atu haruka sidadaun nee fila ba nia rain.
“Iha loron 13 fulan Abril, hau halo ona desizaun politiku ida depois koordena konsulta ho Xefe Governu, hau hatete ona Governu iha desizaun propriu ba ida nee, afavor atu bele haruka Fujetivu fila fali ba iha nia rain,” dehan MJ, Sergio ba jornalista sira iha MNEK, Sesta (06/12/2024).
Tanba tuir nia, Konstituisaun hatete, atu ba estradisaun tenke iha desizaun difinitiva ida husi Tribunal. Governu hein hela sei halo artikulasaun ba buat hotu depende ba iha desizaun Tribunal nian hatete oinsa.
Maibe nuudar politiku no nuudar Ministeriu responsável tuir lei ezekusaun Penal nian tuir lei kona-ba estradisaun nian kabe ba iba Ministeriu Justisa atu haree koordena, atu bele halo prosekusaun ba iha estradisaun nian, maibe tenke fila fali ba desizaun difinitiva ida mai husi Tribunal.
No pozisaun Governu obedese ba iha desizaun haree ba iha sirkunstansia reuni katak, bainhira arguidu ida ka kondenadu ida nia fila ba iha nia nasaun orijen ou Fujetivu ida ba iha nia nasaun orijen la fo nia efeitu ba iha pena prizaun perpetua ka pena morte, ida nee mak sai hanesan rekejitus uniku.
“Labele iha tan sirkunstansia seluk, tanba ita mos tenke respeitu ba iha prinsipiu resepresiodade, mezmu ita seidauk iha akordu estradisaun entre Timor Leste no Filipina, no tenke pundera iha sirkunstansia balu ba iha politika kooperasaun ba iha nasaun rua, iha prinsipiu resepresiodade,” hatete governante nee.
Antes nee, Tribunal Supremu Justisa hasai ona desizaun ida, maibe husi parte defeza la konkorda halo rekursu. No desizaun husi rekursu nee halo re-julgamentu foun, no oras nee daudaun hein deit desizaun ikus husi re-julgamentu nee.
(ter)
