DILI, STLTIMORLESTE.com – Governu liu husi Konselhu Ministru deside ona husu FALINTIL – Forsa Defeza Timor Leste (F-FDTL) no Polisia Nasional Timor Leste (PNTL) atu halo investigasaun klean ba kazu neebe akontese iha Munsipiu Baukau, tanba iha sidadaun balu neebe mak kaer kilat no rama ambon iha Munisipiu Baukau.
Lia hirak nee hatoo husi Primeiru Ministru, Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta, iha Palasiu Prezidensial Bairo Pite, Kinta (16/01/2025).
Primeiru Ministru dehan, relasiona ho sidadaun husi Kelikai neebe uza arma no rama ambon iha Baukau, Prezidente Autoridade Munisipiu Baucau mos relata ona iha Konselhu Ministru, tanba nee husu Komando rua atu halo investigasaun seriu.
“Imi mos rona situasaun iha Baukau, no horiseik Prezidente Autoridade Munisipiu Baukau mai too iha nee, informa mai iha Konselhu Ministru, iha mos prezensa husi Komando PNTL ho F-FDTL, tanba problema neebe mak mosu iha neeba, problema ita temi karik dehan, iha jogadas no manipulasaun husi kotuk karik, tanba ema nia aman nee ema Baukau, Kelikai, haree hanesan halimar, tanba mosu mos pistola, mosu rama ambon, mosu katana, buat sira nee hotu. Tanba nee mak horiseik iha Konselhu Ministru deside ona husu ba komando rua, F-FDTL no PNTL atu halo investigasaun seriu ida hodi ita bele hatene lo-loos tanba sa mak buat nee akonsete iha neeba,” katak PM Xanana.
Primeiru Ministru hatete, relasiona ho kazu nee hatoo husi Prezidente Autoridade Munisipiu Baukau, no prezensa mos husi Komando PNTL no F-FDTL, tanba problema neebe mak mosu iha Munisipiu Baukau temi karik dehan, iha jogadas no manipulasaun iha kotuk.
PM hatete, kuaze fulan ida, hotu-hotu haree buat hotu lao diak, derrepente mosu joven husi Kelikai, husi Laga no husi fatin seluk mak ba fali.
Nia hatete, atu husu deit ba populasaun katak problema ida nee dala barak ema dehan, nee direitu mais iha estadu direitu iha mos dever. Se temi deit direitu, nee direitu hotu mais iha mos dever ba estadu no iha mos dever ba nasaun no ba komunidade.
(eme)