DILI, STLTIMORLESTE.com – Governu liu husi Embaixada Japaun iha Timor Leste (TL) ho CARE Internasional halo akordu ba projetu dezenvolvimentu rural iha Munisipiu Ermera, liu-liu Postu Administrativu Atsabe, ho objetivu hadia moris no pratika nutrisaun saude ba komunidade tomak.
“Hau haksolok tebes ba projetu foun, hanesan projetu ba dezenvolvimentu rural iha Munisipiu Ermera, iha Postu Administrativu Atsabe, oinsa bele hadiak subtansia no pratika nutrisaun saudavel hamutuk ho CARE Internasional hodi implementa, neebe finansia husi Governu Japaun,” dehan Embaixador Japaun, Tetsuya KIMURA liu husi nia diskursu, iha asina akordu ho CARE Internasional ba projetu dezenvolvimentu rural, Postu Administrativu Atsabe nian, Tersa (21/01/2025).
Tuir nia, Embaixada Japaun no CARE Internasional hamutuk servisu hodi apoiu ba melhoramentu moris komunidade iha Atsabe, Munisipiu Ermera nian, dezde tinan 2016, tanba nee ho projetu foun nee sei kontinua foka ba aldeia haat hanesan Ilat, Ilat Kora, Airae no Aiabe iha Atsabe.
Programa nee ho objetivu atu hasae kapasidade grupu sira, liu-liu jestaun bee nian no atu hadia produsaun hortikultura liu husi formasaun sira, oinsa hametin Asosiasaun Poupansa no Emprestimu Suco nian (VSLA) liu husi setor agrikultura ho distribuidor fini sira no habelar kanal venda nian.
Projetu nee tau enfatiza ba hakbiit feto sira liu husi enkoraja sira nia partisipasaun iha VSLA no formasaun sira kona-ba igualdade jeneru nia iha sosiedade.
Embaixador nee dehan, Governu Japaun nia apoiu ba setor agrikola iha Timor Leste kleur ona, tanba fiar katak setor refere sai fundasaun ba kresimentu ekonomiku iha nasaun Timor Leste, hodi troka importasaun ho produsaun domestika.
Tanba nee, CARE International ho Governu Japaun nuudar ezemplar hodi mobiliza suku haat iha Ermera, iha kolaborador ba komunidade Atsabe, hodi produs setor produtu setor agrikultura nian atu sai rendimentu ba feto sira, nunee hadia asesu ba ai-haan nutritivu ba labarik sira.
Entretantu Country director husi CARE Internasional, Petter Good Fellow apresia ba Governu Japaun, tanba bele kontinua fo apoiu ba toos nain sira liu husi projetu ‘HAFORSA’, nunee husi asina akordu ba estensaun projetu nee iha faze terseiru ho montante US$ 346,309, hodi halo dezenvolvimentu rural.
Dezde 2016 too 2019 CARE implementa tiha projetu HAFORSA iha Atsabe, ho objetivu atu hasae toos nain sira nia kapasidade, atu diversifika produtu no tau matan ba sira nia agrikultura no hasae feto nia partisipasaun iha atividade agrikola.
Hafoin projetu faze primeiru nee remata, faze segundu komesa husi 2020 too 13 Fevereiru 2024, iha loron 1 Marsu 2024. CARE no Governu Japaun lansa faze terseiru ba projetu nee ho foku atu hametin liu tan susesu sira neebe atinji ona iha faze anterior sira, liu-liu ba hadiak toos nain sira nia nesesidade moris, responde ba dezafius sira relasiona ho dezigualdade jeneru.
Entretantu Prezidente Autoridade Munisipiu Ermera (PAME), José Martinho do Santos Soares realsa, agradese tebes ba projetu foun ida nee, tanba husi Governu Japaun ho CARE internasional hamutuk hodi implementa projetu dezenvolvimentu rural iha Munisipiu Ermera, liu-liu Postu Administrativu Atsabe, nee meiu ida atu hasae produsaun agrikola, no hasae kapasidade agrikultor sira nian.
(EST 1)