DILI, STLTIMORLESTE.com – Governu labele uza forsa hodi duni sai povu, liu-liu ba desizaun foun ezekutivu nian neebe hasai uma kain 104 husi sira nia hela fatin iha area Kampung Alor, Postu Administrativu Dom Aleixo, Munisipiu Dili, la ho preparasaun fatin foun neebe klaru.
Asaun eviksaun neebe bazeia ba desizaun uniku husi parte Governu laho akordu ho komunidade afetadu sira, konsideira nuudar pasu ida neebe viola direitu baziku sidadaun sira nian ba hela fatin neebe dignu.
Observador Politika, Martinho da Silva kestiona makas atitude Governu liu husi Sekretariu Estadu Asuntu Toponimia no Organizasaun Urbana (SEATOU) nian, neebe hatudu deit forsa administrativu autoritariu hodi hanehan povu kbiit laek sira.
Tuir nia, maske Governu iha direitu legal atu foti fali rai ba interese dezenvolvimentu publiku, maibe prosesu ezekusaun labele duni sidadaun sira laho konsiderasaun umanitaria. Dialogu neebe klean no prepara fatin foun nuudar prioritariu neebe governu tenke rezolve uluk antes halo asaun foti fatin.
“Governu iha kbiit boot atu foti fali nia rai, maibe kbiit nee labele uza hodi halo povu sai fali vítima. Duni sai uma kain 104 laho fo fatin foun nee hatudu katak Governu la interese ba moris diak sidadaun sira nian,”hatete Martinho ba STL, Tersa nee (07/07/2026).
Impaktu husi desizaun nee tuir nia hamosu dezafiu boot ba futuru labarik, feto no katuas ho ferik sira neebe lakon lalais sira nia moris no mahon, hodi hasoru situasaun neebe susar ba nesesidade bazika loron loron nian.
Martinho mos ejize ba Governu atu para ona hakat ho forsa, maibe tenke hatudu responsabilidade nuudar Governu neebe proteje no rona ninia povu rasik.
Iha parte ketak Akademista UNTL, Delfim Moreira mos foti preokupasaun boot konaba duni sai sidadaun sira, laho baze legal no planu sosializasaun neebe diak. Tuir nia, asaun sira hanesan nee bele hamosu instabilidade sosial.
“Governu tenke hanoin katak sira neebe hela iha neeba mos ita nia povu, laos ema estranjeiru. Labele foti fali desizaun hodi duni sai deit sidadaun sira laho solusaun neebe lojiku, tanba nee hatudu ita la konsege fo protesaun ba ita nia povu rasik,”dehan nia.
Entretantu sidadaun sai mos vítima ba eviksaun nee, Daniel Soares, hatoo nia lian tanis no triste tebes, tanba la hatene ona atu lori nia familia ba neebe.
“Ami labele kontra Governu, maibe labele duni sai ami hanesan nee laho fuan no laho hatudu fatin foun mai Ami. Labarik sira atu ba eskola mos susar ona, no ami lakon hotu ona mahon atu hela,” dehan Daniel ho lian triste.
(car)
