DÍLI, STLTIMORLESTE.com — Governu Timor-Leste prepara atu implementa programa Edukasaun Sivika hodi hametin kultura dame, toleránsia no demokrasia iha komunidade, liuliu entre joven sira, liuhosi Komisaun Edukasaun Sivika ne’ebé harii bazeia ba Rezolusaun Governu Númeru 40/2026.
Ministru Interior, Francisco da Costa Guterres hato’o informasaun ne’e depois de hasoru malu ho Primeiru-Ministru (PM), Kay Rala Xanana Gusmão, iha Palásiu Governu, Dili, Kinta (15/10/2026).
Nia esplika katak, Komisaun Edukasaun Sivika nia objetivu mak ajuda komunidade, liuliu juventude, atu komprende di’ak liután demokrasia, respeitu ba malu, toleránsia no uza mekanizmu pasífiku atu rezolve problema sira iha sosiedade.
Tuir Ministru Interior, komisaun ne’e remata ona faze preparasaun durante fulan rua no agora kontinua prepara planu servisu no programa atividade atu bele hahú implementasaun iha terenu.
“Objetivu komisaun ne’e mak atu promove edukasaun sivika, hodi ajuda komunidade no joven sira komprende di’ak liután demokrasia, toleránsia no mekanizmu dame atu rezolve konflitu,” nia esplika.
Komisaun Interministeriál Koordena Implementasaun
Francisco da Costa Guterres hateten katak, implementasaun programa ne’e sei envolve instituisaun governamentál no setór relevante sira, liuliu agrikultura, desportu, juventude, turizmu, edukasaun no setór produtivu sira.
Koordenasaun sei hala’o liuhosi Komisaun Interministeriál, ne’ebé sei lidera husi Vice-Primeiru-Ministru ne’ebé responsabiliza ba asuntu sosiál, ho apoiu husi Komité Ezekutivu no sekretariadu atu prepara planu, programa no atividade sira.
Nia hatutan katak, Komité Ezekutivu sei responsabiliza ba implementasaun programa, inklui prepara relatóriu servisu ne’ebé sei aprezenta ba Komisaun Interministeriál no Governu.
Governu mós planeia hala’o lansamentu ofisiál no sosializasaun ba autoridade sira, atu sira komprende di’ak liután objetivu, funsaun no mandatu komisaun nian.
Programa Pilotu Foka ba Munisípiu Tolu
Ministru Interior esplika katak, hafoin remata preparasaun, komisaun sei dezenvolve programa pilotu iha munisípiu tolu ne’ebé sei identifika tuir nesesidade komunidade no área ne’ebé presiza intervensaun atu promove dame.
Programa ne’e sei kontinua dezenvolve iha tinan tuirmai, ho preparasaun orsamentu no koordenasaun entre instituisaun governamentál sira.
Nia subliña katak, edukasaun sivika la’ós de’it atu fó koñesimentu kona-ba demokrasia, maibé atu hametin mós partisipasaun sidadaun sira nian iha atividade ne’ebé fó benefísiu ba komunidade.
Vise-Ministru Administrasaun Estatal Apoia Koordenasaun
Iha oportunidade nee, Vice-Ministru Administrasaun Estatal, Jacinto Rigoberto, sai hanesan informa mos katak, iha enkontru ho Primeiru-Ministru iha Palásiu Governu.
Programa edukasaun sivika ne’e sei presiza kooperasaun entre instituisaun sira atu garante implementasaun ne’ebé efetivu, liuliu iha nivel komunidade, hodi promove toleránsia, dame no envolvimentu juventude iha atividade produtiva.
(jos)
