DILI, STLTIMORLESTE.com – Governu presiza rezolve imediatu ba problema sosial neebe akontese iha rai laran, nomos liga ho juventude neebe kontinua ba servisu iha rai liur.
Kestaun nee hatoo husi Akademista, Ireniu Viriatu Pires Martins ba STL iha nia knaar fatin Farol, Segunda (17/02/2025).
“Em jeralmente, hanesan Timoroan, akademista nia pontu de vista jeral, Timor Leste hanesan nasaun ida neebe kompleksu tebes todan, atu rezolve kestaun sosial sira, iha situasaun sira hanesan nee ezize tebes lider topu sira neebe iha poder politika lejitimidade atu buka solusaun neebe imediatu atu rezolve. Iha problema sosial ida neebe tenke rezolve fazeadamente. Ligasaun ho problema juventude sira balu sai ba liur buka servisu, husi lensa akademista sira seluk bele haree hanesan nee, maibe laos akademista sira hotu-hotu pro povu, balu la iha neutralidade no buka zona aman, tanba nee ita presiza haree katak laos kestaun nee mak krize lideransa maibe nee tuir los hanesan protesta ida ba Estadu no Governu atu halo reflesaun ida, iha kruzamentu entre esperansa no realidade joven sira nia ba lideransa mihis ona porke la iha vizaun ida dook ba rai ida nee,” katak nia.
Nia hatete, infelizmente ohin loron haree, iha rekursu naturais moris iha rai produtivu ida nia leten, maibe nafatin problema dezempregu ho index neebe aas, dekada rua ona.
“Ita presiza avaliasaun politika publika ida neebe atu haree fila no halo reflesaun ida klean, total populasaun 1,3 habitantes, maioria joven ho porsentu hanesan nee maibe la iha kampu trabalhu, tanba nee mak lider sira presiza iha provizaun politika publika ida neebe diak atu rezolve kestaun dezempregu iha rai laran. Tanba nee ba hau laos kestaun krize lideransa maibe joven sira lakon esperansa ba lider sira atu konduz rai ida nee,” hatete akademista nee.
Nunee mos Eis Prezidente Rede Feto, Judite Dias Ximenes hatutan, Governu presiza iha ona planu oinsa mak bele rezolve problema sosial sira iha laran, liu-liu loke kampu servisu nunee bele trava joven sira ba rai liur.
Nomos diak liu hadia irigasaun sira neebe aat, tanba Timor Leste iha rai produtivu barak mak oras nee abandona hela, ida nee presiza haree tau atensaun.
“Joven balu halo problema tanba sente frustadu laiha kampu servisu ba sira, no sira ba trata dokumentus mos difisil tanba presiza prienxe kriteria barak, entaun diak liu hadia infraestrutura sira nunee sira bele kuda modo halo toos natar hodi sustenta aan no familia,” katak nia.
Entretantu Peskizador AJAR, Inocencio de Jesus Xavier hatete, Governu liu husi Sekretária Estadu Formasaun Profisionál no Empregu (SEFOPE) fo formasaun ba joven sira no Ministeriu seluk presiza loke kampu servisu.
“Ami nia hanoin SEFOPE fo formasaun, Ministeriu seluk loke kampu servisu, tanba ita nia Timoran sira neebe ba Australia no Korea nee laos servisu iha edifisiu, maibe servisu iha toos no industria, tanba saida mak ita nia rai nee la funsiona ba produsaun agrikula,” katak nia.
(eme)
