DILI, STLTIMORLESTE.com – Primeiru Ministru ( PM), Kay Raya Xanana Gusmão hatete, too oras nee Governu seidauk iha hanoin atu loke ka reativa Grupu Arte Marsiais (GAM) no Arte Rituais (AR).
Kestaun nee Xefe Governu hatoo ba jornalista sira iha Palasiu Prezidensial, Nicolau Lobato, Bairo Pite, Dili, Kinta (05/12/2024).
“Governu seidauk iha hanoin ruma atu reativa GAR-AR, seidauk, sorte boot ona, foin daudaun iha konsertu ida iha stadiu Munisipal kampu nian nakonu ho joven, hau la haree imi nia oin, mais kontente, tanba nu fin la akontese buat ida,” dehan PM, Xanana.
Xefe Governu hatete, nia mos informa ba Prezidente Republika katak, furak tebes tanba joven sira komesa hatudu ona sira nia maturidade neebe makaas kria establidade iha rai laran.
“Nee mak ohin hau informa mos Prezidente Repúblika kapaz tebes-tebes, joven sira komesa hatudu diak ona katak, hatene saida mak estabilidade no armonia” hatete Xefe Governu.
Prezidente Republika, Jose Ramos Horta foin lalais hatete, nia mos koalia ona ho Primeiru Ministru, Kay Rala Xanana Gusmão atu bele reativa fali Grupu Arte Marsiais no Arte Rituais.
Entretantu foin lalais mos IX Governu Konstitusional hasai rezolusaun hodi kontinua suspende atividade Grupu Arte Marsiais no Arte Rituais.
(eme)
