DILI, STLTIMORLESTE.com – Governu Timor-Leste liuhosi Sekretaria Estadu ba Igualdade (SEI), selebra Loron Nasionál Feto ba dala 50.
Serimonia nee halao iha Centro de Convenções de Dili (CCD). Kaikoli, sexta-feira (06/11/2026). Iha biban ne’e Sekretária Estadu ba Igualdade, Elvina Sousa Carvalho, hatete katak selebrasaun ne’e sai momentu istóriku atu fó omenajen ba feto Timoroan sira-nia kontribuisaun iha luta libertasaun no dezenvolvimentu nasaun.
“Ohin ita hamutuk iha loron istóriku ida ba dala 50, Timor-Leste selebra Loron Nasionál Feto. Tinan lima-nulu liubá, feto Timoroan sira enfrenta susar no sakrifísiu,” dehan Elvina Sousa Carvalho.
Nia esplika katak, selebrasaun hahú iha loron 3 fulan Novembru, iha Munisípiu Bobonaro, ho atividade oioin, inklui misa agradesimentu, tau ai-funan iha semitériu eroína Maria Tapó, diálogu no kompetisaun voleibol.
Sekretária Estadu ne’e afirma katak istória luta ukun-rasik-an Timor-Leste nian labele kompletu bainhira la rekoñese kontribuisaun feto sira iha rezisténsia nasionál.
Durante okupasaun, feto sira hala’o knaar importante iha frente armada, klandestina no diplomátika. Sira sai estafeta, enfermeira, profesora no apoiu lojístiku ba rezisténsia.
Nia hato’o respeitu no gratidaun ba feto veterana, mártir no feto hotu-hotu ne’ebé sakrifika sira-nia moris ba independénsia.
“Ba feto veteranu, mártir no feto hotu-hotu ne’ebé fó sira-nia moris ba ukun-rasik-an, Estadu no povu hato’o respeitu no gratidaun,” dehan Elvina.
Iha serimónia ne’e, Primeiru-Ministru Kay Rala Xanana Gusmão mós afirma katak Loron Nasionál Feto ba dala 50 sai oportunidade atu hanoin fila-fali istória, fó omenajen ba eroína no hametin responsabilidade ba jerasaun foun.
“Loron ohin hanesan momentu ida atu hanoin fila-fali ita-nia istória, fó omenajen ba feto eroína sira ne’ebé sakrifika sira-nia moris ba liberdade no avalia progresu ne’ebé ita atinje ona,” dehan Xanana Gusmão.
Primeiru-Ministru ne’e hateten katak feto sira kontribui maka’as iha frente armada, klandestina no diplomátika, liuhosi apoiu ba kombatente, fahe informasaun no organiza komunidade.
Nia mós destaca figura eroína Maria Tapó, ne’ebé sai símbolu korajen no kompromisu ba liberdade Timor-Leste.
“Ita-nia eroína Maria Tapó reprezenta feto barak iha aldeia, suku no foho sira, ne’ebé sira-nia kontribuisaun seidauk hetan rejistu kompletu iha istória ofisiál,” dehan Xanana Gusmão.
Prezidente Parlamentu Nasionál, Maria Fernanda Lay mós hato’o apresiasaun tanba bele partisipa iha komemorasaun Loron Nasionál Feto Timor-Leste nian.
Nia afirma katak selebrasaun ne’e la’ós de’it atu komemora data istórika, maibé mós atu rekoñese luta, sakrifísiu, korajen no kontribuisaun feto Timoroan sira ba restaurasaun independénsia no dezenvolvimentu nasaun.
Prezidente Parlamentu Nasionál ne’e konvida sidadaun hotu atu halo refleksaun kona-ba progresu ne’ebé atinje ona no dezafiu sira ne’ebé sei enfrenta iha luta ba igualdade, justisa no dignidade feto Timoroan sira.
(eme)
