DILI, STLTIMORLESTE.com – Governu tenke limita negósiu ki’ik husi estranjeiru, hodi fó oportunidade ba empreendedór Timoroan.
Liafuan nee haktuir husi Dekanu Fakuldade Ekonomia Universidade Dili, Alfredo dos Santos ba STL iha Mascarinhas, kuarta-feira (14/10/2026).
Nia dehan, hodi nunee ajuda sidadaun lokál kompete iha merkadu negósiu.
Nia propoin katak, Governu tenke estabelese kritériu rigorozu ba investidór estranjeiru, inklui rekizitu kapitál, atu proteje oportunidade negósiu ba Timoroan.
Alfredo hateten, komunidade no joven sira presiza hahú dezenvolve negósiu rasik, atu adapta an ba dinamika merkadu no hametin kapasidade kompetisaun.
Nia esplika katak, Timor-Leste nia merkadu nakloke ba investidór estranjeiru, inklui negósiu ki’ik, ne’ebé aumenta kompetisaun ba empreendedór lokál ho kapital limitadu.
“La’ós atu impede investimentu, maibé tenke iha kritériu atu fó oportunidade ba Timoroan hodi dezenvolve negósiu rasik,” dehan Alfredo.
Nia fó ezemplu feto lokál sira ne’ebé hahú fa’an hahán iha estrada, inklui nasi kotak, hanesan inisiativa negósiu ki’ik ne’ebé bele dezenvolve gradualmente.
Alfredo konsidera katak, negósiu lokál enfrenta kompetisaun ho empreendedór estranjeiru ne’ebé iha esperiénsia no kapasidade kapitál atu loke loja boot.
Nia mós hateten katak, loja ki’ik sira, inklui negósiu ne’ebé hala’o husi sidadaun Bangladesh no Pakistan, aumenta kompetisaun iha merkadu lokál.
Nia subliña katak, Timoroan balun seidauk iha kapasidade atu kompete ho negósiu sira-ne’e, liuliu tanba limitasaun kapitál no esperiénsia jestaun negósiu.
Maski nune’e, Alfredo haree katak Timor-Leste iha oportunidade atu hametin empreendedór lokál, liuhusi formasaun no dezenvolvimentu kapasidade negósiu.
Nia refere ba Institutu Apoiu Dezenvolvimentu Emprezariál (IADE), ne’ebé hala’o formasaun no atividade atu hametin kapasidade empreendedór sira.
Alfredo hateten katak, formasaun iha instituisaun akadémika no apoiu ba empreendedór importante, maibé presiza esforsu adisionál atu prepara Timoroan enfrenta kompetisaun merkadu.
Kona-ba asesu kapitál, nia mós temi fasilidade kréditu husi Banku Nasionál Komérsiu Timor-Leste (BNCTL), ne’ebé Governu apoia atu ajuda Timoroan hahú no dezenvolve negósiu.
(dom)
