DILI, STLTIMORLESTE.com – Governu foin lalais nee foti medidas makaas hodi forsa no loder hodi duni sai povu kiik husi sira nia hela fatin ho razaun alargamentu estrada. Maibe realidade iha terrenu hatudu oin seluk, maski povu nia uma naksobu sai rai rahun, estranjeiru sira neebe okupa fatin estratejiku iha kapital nia laran nafatin hamriik metin no Governu la book oituan.
Asaun nee hamosu sentimentu injustisa neebe naruk. Povu sente sai fali estranjeiru iha sira nia rai rasik, tanba dezenvolvimentu neebe dehan ba interese hotu nian nee, faktu iha terrenu hatudu fali kbiit neebe diskriminativu, iha neeba povu sai vítima maibe estranjeiru hetan fali ptotesaun ho razaun rai no ema uma aluga.
Iha fulan no loron hirak nee nakonu ho mata been, povu kbiit laek tenke simu realidade todan bainhira makina loder harahun sira nia fatin buka moris. Maski ho razaun interese publiku, povu kestiona tanba saida mak Governu la uza mos kbiit neebe hanesan hodi dudu ses estranjeiru sira neebe okupa fatin estratejiku iha sidade laran.
“Iha neebe justisa, ami duni sai hanesan animal, maibe estranjeiru sira hakmatek deit iha fatin tanba hetan protesaun husi ukun nain sira,”dehan sidadaun Manuel do Santos neebe ninia uma harahun ona husi loder foin lalais nee, ba STL, Kuarta (13/06/2026).
Ho lian triste Manuel dehan, Governu hakarak duni halo alargamentu estrada ho kbiit forsa nian, regra nee tenke aplika ba ema hotu, laos deit ba povu neebe laiha kbiit hodi koalia.” Ami hein katak dezenvolvimentu nee hanesan naroman ba hotu hotu, laos sai fali loder ida neebe haruhan povu nia futuru, hodi fo dalan ba sira neebe iha osan,”hatete Manuel.
Iha parte ketak Akademista UNPAZ, Antônio de Carvalho asaun neebe foti ka halao husi Governu hatudu momos injustisa sosial neebe boot tebes.” Bainhira Governu uza forsa hodi foti povu nia rai, maibe fo fali privilejiu ba kapitak estranjeiru iha fatin estratejiku, nee laos deit kestaun alargamentu estrada, maibe kestaun vítima, tanba dezenvolvimentu neebe justu tenke lao husi leten ba okos ho regras neebe hanesan ba ema hotu,”dehan Akademista nee.
Nia afirma, dezenvolvimentu infaestrutura labele sai razaun, hodi hanehan fali sidadaun nia direitu fundamental.”Se Governu bele duni povu ho loder, tanba saida mak Governu laiha kbiit neebe hanesan hodi dudu ses interese estranjeiru sira neebe mak okupa espasu publiku, ida nee bele kria sentimentu la konfia husi povu ba sira nia ukun nain rasik,” hatete Antônio.
(car)
