DILI, STLTIMORLESTE.com – Kada tinan Ensinu Superior iha Timor Leste halao graduasaun, maibe too ohin loron graduadu barak, bainhira remata estudu seidauk hetan servisu.
Lia hirak nee hatoo husi Marcos de Jesus Nunes, hanesan graduadu Fakuldade Agrikultura huusi UNPAZ ba STL iha edifisiu ME, Sesta nee (14/02/2025).
“Ita hotu haree, ami neebe remata ona ami nian estudu iha ensinu superior, maibe barak mak seidauk hetan servisu, agora ami neebe mak hili fakuldade agrikultura nee ami bele loke rasik kampu servisu ba ami nian aan liu husi kuda modo no buat seluk tan, maibe ba maluk sira seluk neebe hili fakuldade seluk nee oinsa, ita hatene katak, ita nian rai nee menus kampu servisu no joven barak sai dezempregu,” nia dehan.
Marcos hatutan, karik ba futuru governu presiza loke investimentu boot ruma, atu nunee bele fo servisu ba joven neebe akaba ona estudu iha universidade, se lae barak too ohin loron seidauk hetan servisu.
“Bainhira ita iha investimentu boot ruma, nee bele fo servisu ba ami neebe remata ona estudu, maibe realidade neebe iha, ita menus kampu servisu, entaun hirak neebe foin remata estudu nee atu ba servisu iha neebe, ida nee sai dezafiu ida mai ita,” nia afirma.
Iha fatin seluk, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balu ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
Nunee mos Reitor ISC, Sebastião Perreia dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
(jac)
