DILI, STLTIMORLESTE.com – Gradudus neebe mak remata ona estudu, maibe atu hetan servisu iha instituisaun públiku no privadu, nee depende ba sira ida-idak nia sorti atu hetan servisu lalais.
“Nee sira kompete iha governu nian no instituisaun privadu sira hanesan iha klinika sira, nee depende ba iha sorti deit, se mak iha sorti hetan lalais,.maibe se mak seidauk nee depende ba ida-idak nian esforsu para bele hetan servisu lalais,” dehan Reitor Instituto Ciensia Saude (ICS), Leao Borges ba STL iha nia knaar fatin Balide, Kinta nee (18/06/2026).
Nia dehan, los duni katak tanba alokasaun OJE ba Ministeriu Saude nee la sufisiente, ida nee mak sai hanesan ho impaktu ida ba Ministeriu Saude atu bele absolve graduadus area saude ninia iha kada tinan ninia difisil oituan.
“Tanba politika Ministeriu Saude nian, postu saude ida minimu ema nain neen, maibe tanba orsamentu la sufisiente, entaun parte husi MS nian labele rekruta pesoal saude neebe mak remata ona sira nian estudu iha nivel ensinu superior ninia, neebe mak tuir ita nian nesesidade neebe mak iha,” nia esplika.
Iha fatin seluk, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
(jac)
