DILI, STLTIMORLESTE.com – Graduadu neebe mak remata ona ninia estudu iha nivel ensinu superior kestiona konaba menus empregu iha rai laran, nunee graduadus barak too agora seidauk asesu ba kampu trabalhu.
Liafuan nee hatoo husi Luis da Costa Nunes, nuudar graduadu husi UNPAZ, Fakuldade Ekonomia, ba STL Sesta nee (26/06/2026) afirma, maske graduadu ona iha fulan Dezembru tinan kotuk, too agora seidauk hetan servisu tanba realidade neebe mak iha menus empregu iha rai laran, nunee graduadus barak seidauk servisu. Esforsu buka sempre, maibe vaga neebe mak iha limitadu tebes no depende ba sorti hotu.
“Hau remata hau nian estudu iha fulan Dezembru tinan kotuk, bainhira remata hau esforsu aan buka hela servisu, maibe hau kestiona tanba ita menus empregu, ita idak-idak esforsu aan, maibe instituisaun públiku no privadu neebe loke vaga nee presiza ema oituan deit, laos barak, depois ema barak mak konkore, nee depende ba sorti deit,” nia esplika.
Tuir Luis, dala ruma graduadus balun, bainhira seidauk hetan servisu sira ba tuir fali kursus no balun halao atividades negosiu, nee mos importante, labele iha uma deit, maibe tenke buka dalan oi-oin.
“Formasaun ba lingua nee mos importante, bele aumenta konhesimentu, ita nian joven barak daudaun nee ba servisu iha rai liur, nee balun tuir kursu lian corea no balun tuir kursi lian ingles, nee duni konhesimentu ba lingua nee importante tebes,” nia haktuir.
Nia dehan, joven neebe ba servisu iha liur, sira tuir formasaun ba lingua neebe ohin mensiona, molok sira ba, sira sei tuir teste liu mak foin ba servisu iha rai liur, tanba iha TL menus kampu trabalhu, daudaun nee joven sira ba srvisu iha Australia, Corea no inglatera, hodi bele hadia moris família nian.
“Ita neebe graduadu hotu la hetan servisu, ita bele tuir formasaun sira nee para bele partisipa iha teste hodi koko sorti, tanba ita nian maluk neebe ba servisu iha liur nee liu husi prosesu ida, nee mak tuir formasaun, depois sei tuir tan teste liu mak foin ba servisu iha rai liur,” nia komenta.
Iha fatin seluk, Reitor Instituto Ciensia Saude (ICS), Leao Borges dehan, los duni katak, tanba alokasaun OJE ba Ministeriu Saude nee la sufisiente, ida nee mak sai hanesan ho impaktu ida ba Ministeriu saude atu bele absolve graduadus area saude ninia iha kada tinan ninian difisil oituan.
(jac)
