DILI, STLTIMORLESTE.com – Serimonia graduasaun ba finalista husi Instituto Ciência Saúde (ICS) sei hein resposta husi Ministeriu Ensinu Superior Siensia no Kultura (ICS), tanba lista finalista submete ona iha semana kotuk.
Reitor Instituto Ciensia Saude (ICS), Leao Borges ba STL iha nia knaar fatin, Kuarta nee (01/07/2026) hatete, lista finalista nee hatama ona iha semana liu ba, nee duni agora daudaun husi parte ICS sei hein fali resposta husi MESSK, para bele halao gradusaun ba finalista neebe remata ona sira nian estudu iha ICS, maibe kona-ba preparasaun ba gradusaun ninia nee preparadu ona.
“Ami nian lista finalista neebe remata estudu no tinan nee sei halao gradusaun nee ami submete ona ba iha MESSK, ami submete lista nee iha semana kotuk, maibe seidauk iha resposta husi parte MESSK nian, tanba nee ami hein resposta husi ministeriu refere, tanba bainhira hetan resposta mak foin bele halao serimonia graduasaun. Ami nian finalista sira nee hamutuk 800 resin,” dehan nia.
Nia dehan, ezekusaun ba subvensaun públika nee sei lao hela, seidauk remata, agora atinji ona pursentu hira, nee tanba relatóriu mos seidauk iha, tanba nee agora daudaun ezekusaun ba subvensaun públika daudaun nee lao hela.
“Ami nian finalista 800 resin nee kompostu husi departamentu lima mak hanesan, departamentu infarmajen, parteira, farmacia, laboratoriu no ida seluk tan, ami nian preparasaun ba serimonia graduasaun nee lao ona, kuandu hetan resposta ona mak ami bele buka fatin para bele halo orariu ba graduasaun ninia, tanba ami kria ona komisaun organizadora hahu preparadu ona,” katak nia.
Nia deklara, nee duni komisaun neebe prepara ba graduasaun nee preparadu tiha ona, bainhira hetan resposta ba lista finalista husi MESSK, nee tuir planu sei halao gradusaun iha fulan Julhu tinan nee, nee depende ba hetan resposta husi MESSK, “Ami nian finalista hirak nee prepara aan hodi hein graduasaun, tanba lista ami haruka ona, agora ami hein resposta deit ona para realiza ami nian serimonia importante ida nee ba ami nian finalista sira, ami nafatin garante ba finalista hirak nee, bainhira sira remata gradua bele kompete lalais iha kampu trabalhu,” katak nia.
“Ami nian estudantes sira nee estudu iha area saude ninia, tanba nee ba oin sira remata estudu bele hetan servisu, liu-liu ba iha postu saude neebe daudaun nee pesoal saude ninia sei menus, maibe ida nee kompetensia husi MS nian atu bele halo rekrutamentu ba pesoal saude sira,” katak nia.
Nia hatutan, subvensaun públika neebe MESSK fo, ida nee ezekuta tuir nesesidade instituto ninia, bainhira osan nee ezekuta hotu mak sira sei haruka fali relatóriu 50% nee ba MESSK, hodi bele foti tan 50% nee, ezekuta hotu ida nee mak sei haruka tan fali relatóriu ba ministériu.
“Hau hanoin bainhira lista nee hetan resposta, ami sei halo graduasaun ba ami nian finalista sira iha fulan Julhu tinan ida nee nia laran, tanba lista nee rasik ami submete tiha ona iha semana kotuk,” nia dehan.
(jac)
