DILI, STLTIMORLESTE.com – Hadia estrada iha Nasional liu-liu iha kapital presiza mos halo balansu too iha munisipiu, nunee komunidade sira iha area remotas bele lori sira nia produtu mai faan iha nasional.
Kestaun nee hatoo husi Feto Potensial Maria Soares ba STL iha nia knaar fatin, Kaikoli, Sesta (14/02/2025).
Nia hatete, agradese politiku IX Governu nia neebe oras nee komesa hadia no loke tan estrada iha kapital sidade, maibe labele konsetra iha Dili deit, presiza mos halo balansu too munisipiu sira, nunee komunidade sira bele lori sira nia produtu mai faan.
“Agradese ba politiku Governu neebe hakarak halo sidade sai bonita no hadia mos estrada iha kapital nasaun, maibe husu labele desentraliza iha kapital deit, maibe haluha estrada iha munisipiu sira, tanba nee husu politiku Governu presiza iha balansu hodi hadia mos estrada too munisipiu no munisipiu too postu, suku no aldeia sira, nunee komunidade sira bele lori sira nia produtu ba merkadu,” katak nia.
Nia hatete, iha area remotas komunidade sira kuda modo no aifuan oin-oin, maibe sira labele lori ba faan tanba estrada la diak, motor no karreta susar tama sira nia hela fatin, tanba nee husu Governu hadia estrada iha kapital presiza hadia too iha munisipiu no postu administrativu, suku no aldeia sira.
Nunee mos Visi Diretor HAK, Antonino de Limas hatutan, presiza halo planu iha area urbanu nee oinsa no kapital nee oinsa, atu hadia estrada, iha planu atu halo buat ruma, atu loke estrada halo kaber iha Dili nee tanba haree karreta no motor neebe barak liu hamosu trafiku entaun presiza hadia, maibe presiza mos hadia estrada rural.
(eme)
