DILI, STLTIMORLESTE.com – Knaar mediku, parteira no infermeira nuudar vokasaun hodi halo misaun ida neebe iha ninia relasaun ho ema nia moras no vida, nunee presiza halo ho laran no dedikasaun tomak, tanba dala ruma liu husi hahalok no maneira sira neebe simples bele iha efektividade.
Graduadu Amelia de Fatima Lei husi Universidade da Paz hatete, atendimentu pesoal saude ba pasiente ka ema moras sira laos deit ho medikamentu maibe presiza mos ho sira nia hahalok no maneira neebe sai husi fuan no laran ba pasiente sira, basa dala ruma ho hahalok no maneira neebe simples bele halo efektividade aimoruk nee nian.
Hau nia subrina baixa iha Hospital Vera Cruz, hau mak ba hein. Hau haree no akompanha rasik mediku no infermeiru sira neebe troka malu mai haree nia inklui moras sira neebe mak baixa hamutuk iha fatin nee. Iha pasiente balun mak laran monu ho hahalok no maneira neebe hasai husi pesoal saude balun iha fatin neeba. Haree ida nee, hau ida la moras nee mos senti kontenti ho sira nia atendimentu ho hahalok neebe simples neebe nakonu ho domin,” dehan nia ba STL iha Vila Verde, Kinta (02/07/2026).
Nia afirma, husu ba mediku, infermeira no parteira atu nafatin halo servisu ho laran no pasiensia hodi fo imi nia dedikasaun ba ema moras sira, tanba imi mak airin ema moras nian iha hospital sira. Bainhira imi hatudu imi nia hahalok no maneira neebe simples bele kura ema moras sira bele hamnasa, koalia kontenti fila fali ho moras neebe sira senti.
Nunee mos Estudante Universidade Nasional Timor Lorosae (UNTL), Lorensa Gomes hatete, pesoal saude nia knaar importante tebes, tanba sira nia servisu nee hasoru ema nia moras no ema nia vida. Sira nia knaar nee nuudar vokasaun boot ida neebe sira tenke halao ho fuan no domin hodi dedika tomak ba ema moras sira, atu nunee bele kura no salva ema husi moras.
“Pesoal saude sira presiza koalia ba ema moras sira tenke ho lian kalma, uza liafuan neebe labele soke ema ema laran. Hanesan inan isin rua sira neebe atu partus, parteira no mediku balun hakilar no koalia lian ladun diak hodi soke ema nia laran. Situasaun hanesan nee halo ema nia laran moras liu tan, no senti noras liu tan hodi implika ba nia prosesu hahoris nian. Maibe hahalok hanesan nee sei iha ida rua mak halo hanesan nee, espera ba oin nee bele diak liu tan. Atu nunee ema moras sira tau fiar liu ba iha hospital, hodi mai halo konsulta sira nia moras,” dehan nia.
Nunee mos Pe. Lusio Fernandes de Deus hatete, dala ruma ho hahalok no maneira neebe simples, maibe bele halo efektidade aimoruk nee nian.
“Nee duni knaar hanesan mediku nee vokasaun, hodi halo misaun ida neebe iha ninia relasaun ho ita. Nee duni presiza ita halo ho dedikasaun tomak, presiza halo ho pasiensia tanba limitadu, presiza halo ho domin atu nunee buat neebe ita halo bele iha efektividade,” nia tenik.
Nia hatutan, ba mediku, infermeiru no parteira sira atu kontinua servisu ho laran no fuan, presiza halo ho pasiensia no hatudu hahalok domin nian hodi nunee bele iha efetividade.
(dom)
