DILI, STLTIMORLESTE.com – Antes Enjenaria husi Abu Dhabi halo konstrusaun Dominitoriu Balide sei iha konhesimentu ba Madre Superior iha Roma.
Kestaun nee hatoo husi Madre Guilermina Marçal ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Tersa (11/02/2025).
Madre hatete, halo enkontru ho Prezidente Republika Jose Ramos Horta, Xefe Estadu mos aprezenta kona-ba tempu badak enjeneiru husi Abu Dhabi mai halo konstrusaun, maibe sei hatoo mos karta rekonhesimentu ba madre superior iha Roma.
“Konstrusaun ba dominitoriu, ida nee ohin Prezidente Republika koalia tanba prosesu nee ami presiza iha prosesu ida, tenke iha mos konhesimentu ida ba ami nia superior jeral iha Roma,” katak Madre.
Madre dehan, Prezidente Republika fo ona karta ba madre parte rua haree hamutuk antes haruka ba Roma.
“Prezidente Republika fo ona karta ba ami, ami atu koalia hamutuk, nunee haree hamutuk hafoin haruka ba Roma. Karta Prezidente Republika entrega ona ba hau, karta nee orsida hau lori lai ami nia konselhu provinsial depois mak haruka ba Roma,” katak Madre.
Madre dehan, iha enkontru Prezidente Republika aprezenta mos ba madre kona-ba atu hahu konstrusaun Dominitoriu nee. Aleinde nee koalia mos asuntu sosias liga ho asuntu edukasaun.
Iha biban nee, Prezidente Republika, Jose Ramos Horta hatete, hasoru malu ho Madre Guilhermina Marçal hodi diskute kona-ba konstrusaun Dominitoriu neebe mak sei kontrui husi enjenaria husi Abu Dhabi.
“Sim, ohin enkontru ho Madre Guilhermina nee atu koalia kona-ba konstrusaun Dominitoriu nee mak asuntu prinsipal, haree ida nee hau informa deit ba Madre. Tanba enjeneiru kompanhia neebe kontratu husi Abu Dhabi atu mai ona, enjeneiru sira mai dala hira tiha ona, sira mai halo levantamentu buat hotu-hotu,” katak Prezidente.
Prezidente Republika dehan, enjeneiru sira mai agora atu loke office komesa kee rai edifisiu ruma neebe tenke sobu, halo foun, neebe lalika sobu hadia deit, maibe maioria PR Horta rasik haree tiha ona konseitu sira halo nee furak loos, boot loos, kapas, super modernu.
“Hau hausu tan deit sira tau enerjia solar, tanba tuir ohin nee diak liu enerjia solar tanba moos, no ba ohin madre sira lalika preokupa konta eletrisidade,” katak nia.
Antes Prezidente vizita Estadu ba Abi Dhabi fila hikas mai Timor Leste mos hatete tempu besik enjenaria husi Abu Dhabi sei halo konstrusaun Dominitoriu Madre sira nia iha Balide ida neebe mak kapaas no modernu, nunee bele akumula joven feto sira neebe hela iha asrama.
(eme)
