DILI, STLTIMORLESTE.com – Eskola Sekundária Nobel da Paz hahú ona halo koreksaun ba pontus ezame lokal, bainhira remata bele hatama ona.
Jeremias P. de Jesus nu’udar fundador no diretór atual Eskola Sekundária Nobel da Paz, hatete ba STL Segunda-feira (26/10/2026) katak, pontus ezame lokal nian agora dadaun halo hela koreksaun no iha loron rua ka tolu nia laran bele remata.
“Pontus ezame lokal nian agora dadaun halo hela koreksaun. Dokumentu ezame lokal nian lori uluk ba Ministériu Edukasaun atu tau karimbu, depois lori fila fali mai eskola. Iha Sábadu kotuk, ami foti ona dokumentu sira ne’e, no agora dadaun halo hela koreksaun ba pontus,” nia dehan.
Jeremias esplika katak, ezame pasajen sei hala’o iha loron 23 fulan Novembru 2026, durante semana ida. Tanba ne’e, estudante sira sei kontinua tuir aula normál hodi prepara an ba ezame pasajen.
Nia hatutan katak, pontus ezame nasionál nian lori ona ba Ministériu Edukasaun, enkuantu pontus ezame lokal nian sei halo koreksaun iha eskola.
“Pontus ezame nasionál nian lori ona ba Ministériu Edukasaun. Maibé, ba ezame lokal, ami halo koreksaun iha eskola depois simu fila fali dokumentu ne’ebé Ministériu tau ona karimbu,” nia esplika.
Jeremias mós informa katak, estudante sira sei fila fali ba eskola iha Tersa-feira atu kontinua aula, enkuantu hein ezame pasajen ne’ebé sei hala’o iha loron 23 fulan Novembru.
Iha parte seluk, estudante Cidalia dos Reis hatete katak estudante sira remata ona ezame no agora hein rezultadu, enkuantu prosesu koreksaun ba pontus ezame lokal no nasionál sei kontinua.
“Ami remata ona ezame no agora hein rezultadu, tanba pontus ezame sira sei liu hosi prosesu koreksaun. Ami nu’udar estudante hein de’it rezultadu ne’e,” nia informa.
Estudante seluk, Bento de Jesus mós konfirma katak, ezame rua ne’e remata ona, no estudante sira hein de’it bainhira eskola sei fó sai rezultadu.
(jac)
