DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho forma Maustratus no krimi Arma Branka, solisita ba iha Tribunal Koletivu atu kondena arguidu ho inisial MJ pena suspensaun tinan 2.
Alegasaun nee halao iha loron Kinta (16/01/2025), iha sala julgamentu laran Prokuradora Bemvinda do Rozario deklara katak, faktus neebe konsta iha akuzasaun provadu hotu, katak arguidu komete duni krimi neebe MP akuza ba.
Prokuradora deklara, lezada FSB neebe hanesan arguidu nia feen, no lezadu nain rua AJ no AJL neebe hanesan arguidu nia oan mos konfirma ba faktus katak, arguidu halo duni agresaun hasoru sira, tanba ho kondisaun lanu.
Prokuradora deklara, lezada no nia oan nain rua haree duni arguidu kaer tudik ida, tanba nee kona-ba krimi Arma Branka Prokuradora konsidera prienxe elementu krimi neebe iha, maibe kona-ba krimi Violensia Domestika ho forma Maustratus, Prokuradora husu Tribunal atu alterasaun kualifikasaun juridika ba fali iha krimi Violensia Domestika ho Forma Ofensa Integridade Fizika simples.
Bazeia ba deklarasaun sira nee hotu, ikus mai Prokuradora husu ba iha Tribunal atu kondena arguidu ho Pena Prizaun tinan 2, suspende ba tinan 2.
Enkuantu defeza João Carvalho husu Tribunal atu tetu deklarasun hotu, no husu atu aplika pena neebe justu ba arguidu.
Rona tiha deklarasaun sira nee, Tribunal adia ba loron seluk hodi rona desizaun.
Tuir akuzasaun neebe iha katak, lezada FSB moris hamutuk ho arguidu hanesan feen no laen, sira iha oan nain 8.
Lezada AJ no lezadu AJL relasaun ho arguidu hanesan aman no oan. Iha loron 19 fulan Agostu tinan 2021, haleu oras tuku 09:30, iha Laulara Aileu, arguidu MJ ho kondisaun lanu, kaer sigaru iha liman hodi sunu ba lezada FSB nia ulun fatuk, tuku ho makaas iha lezada nia oin, maibe lezada sata netik ho liman, nunee lezada nia liman kona fali lezada nia inus, no arguidu kontinua atu baku tan lezada, maibe lezada nia oan feto ba sata netik hafoin arguidu halai ba foti tudik ida ho medida naruk, ameasa atu sona ba lezada maibe la konsege, tanba lezada halai tiha.
Haree lezada AJL ba sori netik, nunee arguidu MJ lori liman basa ho makaas dala ida ba iha lezada nia kanuruk. Tanba sente la diak ho hahalok arguidu MJ, lezadu AJL hase arguidu dehan, apa labele halo hanesan nee ba ama, ami boot ona haree hanesan nee ami moe, rona ida nee arguidu basa dala ida kona iha lezadu nia matan, halo lezadu oin nakukun atu monu.
Konsekuensia direita husi arguidu nia hahalok nee, lezada FSB hanesan arguidu nia feen sente moras iha isin lolon, lezada AJ no lezadu AJL hanesan arguidu nia oan sente moras iha parte neebe arguidu basa ba.
Tanba nee, Ministeriu Publiku akuza arguidu komete krime Violensia Domestika ho forma Maustratus no krimI Arma Branka.
Hatan kona-ba akuzasaun nee, arguidu konfesa imparsial ba faktus katak, arguidu halo duni krimi refere.
Audensia julgamentu nee prezide husi Juiz Koletivu, Jose Maria, Ana Paula, Ersilia De Jesus, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Defensor Publiku, João De Carvalho.
(jac)
