DILI, STLTIMORLESTE.com – Kondisaun infraestrutura eskola sira iha área remota presiza hetan reabilitasaun no aumentu fasilidade, hanesan meza no kadeira, atu garante ambiente aprendizajen ne’ebé apropriadu ba estudante sira.
Diretór Servisu Edukasaun Munisípiu Ainaro, Patrício da Costa Magno, hato’o preokupasaun ne’e ba STL liu husi telefone, Segunda-feira (09/11/2026).
Nia esplika katak, maski eskola balun iha área remota hetan ona reabilitasaun no apoiu hosi Ministériu Edukasaun (ME), maibé sei iha eskola balun ne’ebé presiza hadi’a tan, inklui falta fasilidade bázika hanesan meza no kadeira.
“Kondisaun eskola balun iha área remota sira hadi’a hela ona, maibé eskola sira ne’ebé seidauk iha kondisaun di’ak presiza reabilitasaun no apoiu ba fasilidade. Iha eskola balun, meza no kadeira sei menus, maski Ministériu Edukasaun fó ona apoiu, maibé seidauk sufisiente,” nia dehan.
Patrício da Costa Magno hatutan katak, eskola balun presiza reabilitasaun, enkuantu seluk presiza konstrusaun foun atu responde ba nesesidade estudante sira. Tanba ne’e, apoiu ba fasilidade hanesan meza no kadeira presiza kontinua.
Nia mós afirma katak, Servisu Edukasaun Munisípiu Ainaro kontinua halo identifikasaun ba kondisaun infraestrutura no nesesidade fasilidade iha eskola sira. Rezultadu identifikasaun ne’e sei relata ba Ministériu Edukasaun iha nível nasionál, atu bele hetan atensaun no resposta.
“Agora daudaun ita kontinua halo identifikasaun ba fasilidade no kondisaun eskola sira ne’ebé sei aat. Asuntu sira ne’e ita sei relata fali ba Ministériu Edukasaun nasionál, atu haree no fó resposta. Maski fasilidade balun hetan ona apoiu, maibé seidauk sufisiente,” nia haktuir.
Iha parte seluk, Diretór Edukasaun Munisípiu Likisá, Júlio da Silva, mós hateten katak, eskola balun iha munisípiu ne’e sei hasoru falta meza no kadeira. Nune’e mós, kondisaun infraestrutura eskola balun presiza reabilitasaun no konstrusaun foun.
Júlio da Silva esplika katak, identifikasaun ba nesesidade sira ne’e kontinua hala’o liuhosi inspetór eskolár sira, ne’ebé halo monitorizasaun ba kondisaun eskola iha terrenu.
“Ita kontinua halo identifikasaun liuhosi inspetór eskolár sira ne’ebé halo monitorizasaun ba eskola. Ida-ne’e tanba kondisaun infraestrutura no fasilidade sira seidauk sufisiente atu responde ba nesesidade estudante sira,” nia akresenta.
(jac)
