DILI, STLTIMORLESTE.com – Prezidente Republika (PR), José Ramos Horta hatete, atu hadia rai nee ba oin, presiza hametin dame no seguransa, laiha dalan seluk.
Xefe Estadu hatoo lia hirak nee ba jornalista sira, bainhira remata halo enkontru ho ekipa husi Multi Science Academy, iha Palasiu Prezidensial, Nicolau Lobato, Bairo Pite, Dili, Tersa (11/02/2025).
Prezidente Republika hatete, ohin hamutuk ho joven sira neebe ligadu ho IT website iha area informatika, joven sira husu Prezidente koalia ho sira kona-ba edukasaun informátika teknolojia.
“Maibe koalia mos kona-ba dezafiu neebe rai nee enfrenta kona-ba politika jerasional, para ukun rai nee prepara aan, no prepara aan nee tinan 20 resin ona, jerasaun foun prepara aan ona para simu husi jerasaun 1975 neebe dada rai nee ba Independensia, depois husi Independensia too agora saida tan mak bele halo ba oin para hadia liu tan rai nee, hametin dame iha rai laran, tanba ho dame no seguransa mak bele ba oin, laiha dalan seluk,” katak Horta.
Horta dehan, rai nee ba oin presiza hametin dame iha rai laran, laiha dalan seluk, dalan uniku no diak mak hametin dame, haklean dame iha rai laran, nunee bele kontinua buat barak neebe halo iha kotuk.
“Hau remata koalia mos kona-ba lideransa no fo ezemplu maun boot Primeiru Ministru Xanana nia lideransa, tanba nia matenek, nia raan malirin aten boot mak ohin ita hamriik iha nee, nia mak hadia FRETILIN, kuandu FRETILIN mate hadia FALINTIL, kuandu FALINTIL mate nia mak dada ita ba referedum ho raan malirin ulun malirin, entaun ida nee ezije lideransa estuda didiak saida mak lideransa hanesan mos Maun Xanana ho Lider seluk tan iha Timor no iha mundu, nee mak importante tebes ba joven,” katak Horta.
Nia hatutan, joven no jerasaun foun laos sira ida idade 20 anos, maibe sira neebe 40 anos no 50 anos iha ona esperiensia tinan 20 nia laran.
Nunee mos CEO Multi Science Academy, Alfa Freitas hatete, enkontru ho Prezidente Republika nee marka istoria ida ba Organizasaun rua Multi Science Academy, tanba bele hetan previleiju ba tempu ida neebe oferese hausi Prezidente Republika, Jose Ramos Horta.
“Hetan previleiju boot ida ba tempu ida neebe Prezidente Republika oferese mai ita hodi halo enkontru, no enkontru nee importante tebes atu aprezenta kronolojia jornada Multi Science Academy nia oinsa motiva no prepara hela atu oferese ba ita nia nasaun liu-liu ba iha kapasitasaun juventude nia no prepara sira ba iha rekursu umanu ba futuru nasaun nia,” katak nia.
Objetivu enkontru ohin loron aproveita aprezenta mos programa Multi Science Academy nia neebe bolu eskola ba skil programa inovativu hanesan iha Indonezia karik ruangan guru neebe sei lansa iha tinan 2025 nia laran, tanba nee mak mai buka apoiu husi Prezidente, nunee bainhira lansa programa ida nee karik benefisiu ba nasaun, servisu hamutuk ho nasaun.
(eme)
