DILI, STLTIMORLESTE.com – Prezidente Repúblika José Ramos-Horta fó onra ba joven sira nia korajen no sakrifísiu iha luta ba ukun rasik aan, durante komemorasaun 12 Novembru 2026.
Horta hato’o mensajen ba komemorasaun ne’e iha Kinta (12/11/2026), ne’ebé marka dala 35 Masakre Santa Cruz no dala 21 Aniversáriu Loron Nasionál Juventude.
Prezidente hateten katak, loron 12 Novembru nu’udar momentu importante atu hanoin fali luta, korajen no sakrifísiu joven Timor-oan sira nian ba justisa no liberdade.
Nia lembra katak, iha 12 Novembru 1991, foin-sa’e Timor-oan sira halo marcha pasífika husi Igreja Motael ba Semitériu Santa Cruz, hodi fó onra ba maun-alin ida ne’ebé mate no hato’o sira-nia apelu ba justisa no liberdade.
Horta mós destaka katak, imajen masakre ne’ebé jornalista Max Stahl rejista no lori ba mundu tomak sai prova importante kona-ba luta povu Timor-Leste nian ba autodeterminasaun.
“Ohin, ita mós selebra Aniversáriu Loron Nasionál Juventude nian ba dala 21. Ida-ne’e mak loron ida atu fó onra ba ita-nia joven sira nia aten-barani, reziliénsia no entuziazmu, no atu rekoñese sira-nia potensiál nu’udar ajente ba mudansa,” dehan Prezidente Horta.
Prezidente afirma katak, komemorasaun 12 Novembru la’ós de’it atu hanoin fali istória luta no sakrifísiu ba independénsia, maibé mós atu hametin unidade, pás, solidariedade no identidade nasionál.
Nia hateten katak, joven sira iha tinan 1991 luta atu determina sira-nia destinu, enkuantu juventude ohin loron iha responsabilidade atu kontinua forma nasaun nia futuru.
“Foin-sa’e sira iha tinan 1991 luta ba ita-nia direitu atu determina ita-nia destinu. Foin-sa’e sira ohin loron iha kbiit atu forma destinu ne’e,” dehan Horta.
Ho espíritu 12 Novembru nian, Prezidente bolu Timor-oan hotu atu hamutuk harii pás no prosperidade ba dezenvolvimentu sustentável.
Horta husu ba joven sira atu domina teknolojia, buka edukasaun, rejeita divizaun no sai líder iha área hotu-hotu.
Nia subliña katak, dezafiu Timor-Leste nian agora la’ós konflitu, maibé kriasaun, inovasaun no kompetisaun rejionál.
“Imi la’ós de’it líder sira ba aban-bainrua nian; imi mak ajente sira ba mudansa iha loron ohin,” dehan Prezidente.
Horta remata mensajen ho esperansa katak, memória mártir Santa Cruz nian kontinua inspira jerasaun foun, no husu Maromak atu haraik bensaun ba juventude no Timor-Leste.
(eme)
