DILI, STLTIMORLESTE.com – Prezidente Republika (PR), Jose Ramos Horta hatete, eis Ministru Interior Longuinhos Monteiro halo tratamentu ba Indonezia, tanba ajuda husi amigu Indonezia, laos Governu Timor Leste mak selu, no durante nee prezidente apoiu povu kiik barak hodi halo tratamentu.
Prezidente Republika Jose Ramos Horta hatoo kestaun nee ba jornalista iha Aeroportu Internasional Nicolao Lobato, Komoro, Sabadu (25/01/2025),
Nia dehan, Longuihos ba halo tratamentu iha Indonezia, tanba Prezidente nia amigu sira mak haruka aviaun mai tula, laos Governu Timor Leste mak selu, no durante nee Prezidente mos apoiu povu kiik lubuk ida ba halo tratamentu iha rai liur.
“Longuinhos Monteiro hau nia amigu sira iha Indonezia mak haruka aviaun mai tula nia, hau ba too iha nia fatin nee dala tolu iha ICU, kuandu establiza tiha aviaun espesial husi Indonezia mak mai gratis no hospital mos gratis. Governu la selu duit metan ida, mezmu Governu atu selu nee obrigasaun, tanba ita akontese ona dala ruma desizaun kleur tebes ema moras daudaun laos deit ba Longuinhoss,” katak Horta.
Prezidente dehan, durante nia apoiu povu kiik barak mak ba halo tratamentu iha rai liur, hanesan nia simu kontaktu husi povu balu iha Bekora, ba haree kosok oan ida neebe moras iha ulun sai boot ba daudaun doutor sira labele halo buat ida no Prezidente rasik mak lori doutor husi Australia tama too kosok oan nia fatin ba haree labarik nee.
“Labarik nee hein tinan 2, labarik nee nia inan aman ema F-FDTL, dala hira los foin tinan 2 kotuk ba labarik ida hau trata lori ba Jakarta ain bubu too iha neeba sira trata diak fila halo tiha amputasaun laos deit ba ema boot ruma,” katak PR.
PR Horta dehan, nia asiste iha media rona ema koalia mangame liga ho Senhor Longuinhos, maibe sira koalia la hatene faktus.
Foin lalais Prezidente Komisaun F, Parlamentu Nasional (PN), Maria Gorumali Barreto hatete, eis Ministru Interior (MI), Longuinhos Monteiro moras kurasaun iha fulan kotuk liu ba baixa iha Hospital Nasional Guido Valadares (HNGV), maibe transfere ba rai liur nee intervensaun husi Prezidente Republika (PR), Jose Ramos Horta atu halao tratamentu lalais tanba moras grave.
(eme)