MAUBISSE, STLTIMORLESTE.com – Prezidente Republika (PR), Jose Ramos Horta sente triste tanba lakon jornalista senior diak ida Otelio Ote, neebe hakotu nia peregrinasaun iha mundu nee.
Prezidente Republika Jose Ramos Horta hatoo sentimentu tristeza nee ba jornalista sira iha Suku Maubisse, Munisipiu Ainaro, Kuarta (29/04/2026).
Prezidente Republika hatete, sente hakfodak bainhira rona novidade katak Jornalista Senior Otelio Ote hakotu nia peregrinasaun iha mundu nee hodi fila hikas ba nain nia kadunan santo iha nia rai moris fatin Oecusse.
“Sim hau foin dadauk rona hau hakfodak mate iha Oecusse jornalista ida diak tebes ema ida ke diak tebes simples homilde, hanesan mos eis Prezidente Konselhu Imprensa lakon boot kuitadu nia mos hetan strok,” dehan Prezidente Republika.
Prezidente Republika hatete, ornalista senior hakotu vida tanba ho moras estrok, moras nee perigu bainhira lahalo tratamentu, maibe buat moris nia rohan hotu hotu sei mate tanba destinu iha Maromak nia liman.
“Strok nee ohin ita bele diak hela o la hatene problema ruma iha o nia fuan derepente mate foin dadaun kuitadu Ministru ensinu superior nomos eis Deputadu Marito Mota, nee barak los ita reza ba sira lakon boot ba ita ba rai nee, maibe vida mak nunee o atu mate tenke moris deit, o moris o hatene ona o sei mate ohin ka aban nee iha Maromak nia liman,” katak PR Horta.
Iha biban nee Prezidente Republika hatoo sentidu kondelensia ba familia neebe lakon familia liu liu ba Jornalista senior Otelio Ote nia familia neebe oras nee lutu tanba lakon laen aman tio diak ida iha familia. “Ba sira nia familia ba jornalista hotu hotu neebe lakon kolega diak ida,” dehan Prezidente Horta.
Bainhira Prezidente Republika fila husi Ainaro hakat liu ba maktoba nia fatin hodi presta omenajen ba familia enlutada sira.
(eme)
