DILI, STLTIMORLESTE.com – Prezidente Republika (PR), Jose Ramos Horta husu sidadaun hotu atu hakruuk no fo ondra ba eroi sira neebe mak fo aan mate iha loron 7 Dezembru 1975, bainhira Indonezia invade Timor Leste.
Xefe Estadu hatoo lia hirak nee ba jornalista sira, bainhira remata halao lansamentu Livru husi Primeiru Ministru, Kay Rala Xanana Gusmão iha salau MNEK, Dili, Sesta (06/12/2024).
“Loron 7 Dezembru, ita hakruuk deit ba eroi vitíma sira loron 7 Dezembru mate. Nicolau Lobato nia feen mate iha loron 7 Dezembru nee, Timoroan lubuk ida hau rasik konhese, Rogerio hau nia amigu belun boot ami nain rua mak funda ETNA laiha ema seluk, iha fulan Outubru 1975 hahu ETNA, ema lubuk ida mate, depois liu tiha nee ema mate, too 1991 rihun atus ida tiha ona mak mate, tanba funu, hamlaha,” dehan PR, Horta.
Rai nee tuir Xefe Estadu hetan ukun ho sakrifisiu povu Timor Leste nian, husi nia mate no raan fakar mak hodi hetan independensia, tanba nee presiza hakruuk ba eroi sira.
Tanba nee husu joven sira kontinua estuda, tanba rai nee sai boot laos ho kilat, maibe ho kakutak matenek, tanba nee husu joven sira kontinua estuda nunee lori rai nee ba oin.
No estadu iha obrigasaun tau bolsa estudu haruka joven neebe remata ona kursu ruma iha rai laran, hanesan lisensiatura ruma neebe iha nota diak haruka ba liur Australia, Indonezia, Portugal, Brazil, Amerika ba estuda, Timoroan rihun ba rihun ho mestradu no doutoramentu.
(eme)
