DILI, STLTIMORLESTE.com – Instituto Ciência Saúde (ICS) ezekuta ona subvensaun públika 50% neebe hetan apoiu husi Ministériu Ensinu Superior Siensia no Kultura (MESSK), daudaun nee ninia ezekusaun atinji ona 70%.
Haktuir Reitor Instituto Ciensia Saude (ICS), Leao Borges ba STL iha nia knaar fatin Balide, Kinta nee (23/07/2026).
“Hau hanoin ezekusaun ba subvensaun públiku 50% nee, agora daudaun ninia ezekusaun nee sei lao hela no seidauk hotu, maibe besik hotu ona, nee duni ninia ezekusaun nee atinji ona 70%, nee ba subensaun públika 70% nian. Maske ninia ezekusaun nee seidauk remata, ami prepara ona relatóriu atu submete ona ba iha MESSK, nunee ami bele hetan tan fali 50% nee,” nia informa.
Nia dehan, ninia ezekusaun subvensaun nee prioridade ba hola ekipamentus laboratoriu nian, servisu komunitariu no seluk tan, konaba formasaun lian português ba dosentes sira nee seidauk ida, tanba nee agora daudaun ezekusaun subvensaun públika ba 50% nee sei lao hela.
“Ezekusaun nee agora sei lao hela, hotu mak ami bele hatama relatóriu ba iha MESSK, ami hetan uluk subensaun 50%, ida ezekuta hotu, nee ita tenke hatama relatóriu, simu fali 50%, subvensaun ida bele apoiu ami sosa fasilidade hirak neebe mak ami sei presiza, daudaun nee ami prepara ona,” nia esplika.
Nia dehan, ICS nafatin hetan subvensaun ida nee, ICS ezekuta subvensaun ida nee tuir nesesidade ou prioridade neebe mak ohin mensiona, haree ba iha ekipamentus pratika nian ba departamentu lima neebe daudaun nee eziste hela iha ICS.
Iha fatin seluk, Domingos Barros hanesan Diretor Jeral Ensino Superior no Siensia dehan, relasiona ho subvensaun públika neebe mak Ministériu Ensinu Superior Siensia no Kultura (MESSK) atribui ona ba ensinu superior privadu sira iha rai laran, maibe too ohin loron sira seidauk submete relatóriu ba Ministériu refere.
“Konaba subvensaun publiku ba universidade privadu sira Ministeriu atribui ona 50% ba etapa primeiru nian ba ensinu superior sira, maibe sira seidauk hatoo relatoriu mai ministeriu. Depois relatoriu mai mak ita foin atribui segundu etapa. ECTI troka ona naran ba ESEIK tanba entrega ona ba governu hanesan instituisaun públiku ona,” nia esplika.
Nia dehan, MESSK atribui ona subvensaun públika ba ensinu superior privadu sira iha rai laran, maibe fo uluk 50%, bainhira sira ezekuta hotu ida nee hatoo fali relatóriu mai MESSK para atribui ba etapa segundu nian ba sira, tanba agora daudaun etapa primeiru nian nee ensinu superior sira seidauk hatama relatóriu mai ministeriu.
(jac)
