DILI, STLTIMORLESTE.com – Instituto Ciência Saude (ICS) sei submete lista estudantes finalista 800 resin ba Ministériu Ensinu Superior Siensia no Kultura (MESSK).
Lia hirak nee hatoo husi Reitor ICS, Leao Borges ba STL iha nia knaar fatin Balide, Kuarta nee (17/06/2026).
“Tinan nee ami sei halo graduasaun ba ami nian funalista sira hamutuk 800 resin, besik 1000, data ba graduasaun nee seidauk hatene, tanba ami sei hatoo lista finalista ba iha Ministériu Ensinu superior Siensia no Kultura, depois sei verifika no fo sai iha jornal republika, hafoin ita bele realiza ba iha serimonia graduasaun,” nia deklara.
Nia dehan, lista finalista nee seidauk hatama, tanba agora daudaun sei prepara hela, maibe semana oin nunee bele submete ona lista nee ba MESSK, finalista 800 resin nee kompostu husi departamentu lima hanesan infarmajen, parteira, farmacia, laboratoriu ho nutrisaun.
“Ami nian estudantes finalista hirak nee balun ezame daudaun ona, tanba ninia numeru neebe mak atu gradua nee besik 1000, maibe lista finalista nee ami tenke haruka ba iha parte MESSK, agora daudaun ami sei prepara hela,” nia esplika.
Nia dehan, bainhira institutu ida atu halo graduasaun ba ninia finalista sira nee presiza haruka lista ba iha ministériu, ho nunee bele públika iha jornal da republika, hafoin bele halao serimonia graduasaun ba finalista sira neebe remata ona estudu.
(jac)
