VENILALE, STLTIMORLESTE.com – Idozu Antonio de Sousa idade 86 no feen kaben Antonia de Sousa idade 84 ho nia oan mane Jaime de Sousa idade 48 sofre moras defisiensia pisikolojika hela deit iha uma kondisaun aat, neebe taka ho nuu tahan no didin ho au neebe hahu dodok.
Idozu Antonio de Sousa atual sofre kondisaun saude la permite no feen kaben Antonia de Sousa sofre moras Asma kuaze tinan naruk. Sira nain rua kous oan mane mesak, mak Jaime de Sousa, maibe desde sei idade labarik sofre ona moras difisiensia pisikolojika too oin loron, iha neebe durante tinan naruk sira hela deit iha uma aat nee, iha Aldeia Caihula, Suku Uma Ana Ulo, Postu Administrativu Venilale, Munisipiu Baukau ho uma kuartu ida, laiha sala varanda obrigado tenke tein, han no toba iha deit kuartu refere neebe laiha janela, maibe uma neebe durante nee esperansa ba sira, hahu aat oan, tanba durasaun tinan naruk ona.
Ho Idozu Antonio de Sousa ho emosaun triste esperesa, iha hanoin atu konstrui uma maibe laiha finanseiru, tanba nee obrigadu tenke nonok hela ho uma kondisaun nunee, tanba lakohi halo kolen familia.
“Hau triste hela ho uma kondisaun hanesan nee udan tama, hau nia oan kondisaun moras. Hau iha familia maibe ami labele ba hela ho sira tanba ema oan barak,” hateten Idozu Antonio de Sousa ba jornalista sira iha Caihula, Domingo (10/05/2026).
Mezmu ho kondisaun moris nunee, maibe familia simples nee iha sentimentu lakohi ba hela hamutuk ho familia, maibe deside hela ketak, tanba lakohi halo kolen familia seluk ba sira nain tolu nia moris.
Idozu Antonio de Sousa, feen kaben Antonia de Sousa ho nia oan mane Jaime de Sousa sira nain tolu hetan ona subsidiu kada trimestral husi Estadu Timor-Leste neebe atribui liu husi Ministeriu Solidariedade Sosial no Inkluzaun, maibe la sufisiente, tanba nee obrigadu hela ho uma kondisaun nunee, iha neebe laiha fasilidade dapur hanesan bikan, kanuru, sana neebe diak iha sira nia hela fatin, atual iha deit fos natoon iha balde laran.
Antonio Saliente, senti kondisaun moris nee todan, maibe labele halo mudansa, tanba oan neebe sira nain rua nia feen nia laran, desde idade sei labarik too ohin loron infrenta moras difisiensia pisikolojika neebe prezisa tau matan husi idozu no idoza nee.
“Karik ami rua hau nia feen mak mate dala ruma hau nia oan hanesan nee hela moris oinsa ami labele hatene, tanba kondisaun hanesan nee,” Antonio lakon espransa.
Vizinhu Ana Madalena la nega, familia nee sempre hetan vizita husi familia sira seluk, maibe labele ajuda harii uma mahon dignu ida ba sira nain tolu, tanba familia sira mos sei moris ho rendimentu menus, nunee hanesan viznhu iha sentimentu umanu atu apoiu familia nee, maibe laiha kbiit.
“Ami haree ba familia nee mos triste hau haree fali ba hau nia moris nee mos triste. Iha familia, maibe hela dook hotu, se sira moras ami ajuda lori ba hospital, maibe ba buat seluk ami labele,” Ana Madalena katak.
Xefe Aldeia Caihula Silvestre da Costa rekonhese, sidadaun nain tolu nee moris mizeravel, tanba hela uma kondisaun aat iha neebe tempu udan implika ba sira nia deskansa, maibe labele halo konstrusaun uma diak, tanba kestaun idade no oan sofre moras difisiensia pisikolojika.
Nunee durante uma neebe sira hela laos sira nain tolu mak konstrui, maibe selu ema, tanba laiha finanseiru obrigadu tenke konstrui deit ho material lokal iha neebe taka ho nuu tahan didin ho au atual uma refere liu ona tinan 10.
“Sira nain rua mak oan ida nee deit maibe difisiensia grave. Sira nia uma nee kuartu laiha tein iha nee, toba iha nee bikan kanuru tau hamutuk iha nee,” Silvestre aprezenta.
Nia komenta, sidadaun nain tolu nee hetan ona subsidiu kada trimestral husi Estadu Timor-Leste, maibe labele utiliza ba konstrusaun uma, tanba mata dalan orienta osan refere atu utiliza ba han hemu no la too atu halo konstrusaun uma foun ida.
Nia rekonhese, Estadu Timor-Leste liu husi parte oin oin iha politika atu apoiu familia vuneravel sira ba konstrusaun uma foun ida, maibe Autoridade Aldeia seidauk submete proposta ba parte kompetente atu ajuda familia refere hetan apoiu.
“Ami koalia buat neebe transparansia buat neebe loos, ami seidauk, tanba ami dehan dalan nee oin nusa karik ami seidauk hetan, foin lalais STL ho RTTL mai iha nee, nee mak ami hein iha nee para halo transparansia,” Silvestre komenta.
Entretantu too notisia nee publika, STL seidauk hetan komfirmasaun husi Diretor Sentru Solidariedade Sosial no Inkluzaun Munisipiu Baukau, Albino Nicolao Freitas, tanba loron feriadu.
(tom)
