BAUCAU, STLTIMORLESTE.com – Idozu Elvino Soares Belo, idade 81, monu husi tua akadiru hun iha Aldeia Ossoua, Suku Tirilolo, Postu Administrativu Baucau Vila, Munisipiu Baucau, rezulta mate fatin.
Xefe Suku Tirilolo, Elvino Freitas Belo haktuir, insidente nee akontese iha loron 05 Julhu parte loraik, bainhira idozu refere ba koa tua akadiru iha area Uaiono Aldeia Ossoua, maibe liu tuku 17:00 loraik, komunidade sira hetan idozu refere monu hela iha tua akadiru hun neebe baibain idozu koa.
Tanba nee komunidade sira informa ba familia hodi ba haree idozu refere, maibe bainhira familia too iha fatin haree idozu refere ho kondisaun iis laiha, tanba mate fatin.
“Katuas nee baibain koa tua faan iha estrada ninin, maibe monu nee hau husu ba komunidade sira no Xefe Aldeia sira mos seidauk hetan informasaun klaru, tanba monu nee iha tua okos duni, maibe kaer kois mak monu ga oinsa nee sira seidauk informa,” Xefe Suku Tirilolo, Elvino Freitas Belo haktuir ba jornalista sira iha Tirilolo Baucau, Segunda (06/07/2026).
Nia sublina, matebian nia kadaver parte familia asegura ona iha nia rezidensia Ossoua no atu submete matebian nia isin mate ba autopia nee desizaun iha parte familia nia liman.
“Ami mos husu maibe familia sira seidauk fo informasaun atu lori ba autopasia ga iha deit neeba, maibe parese familia tur hamutuk mak iha solusaun,” Elvino Freitas Belo informa.
Iha fatin ketak, matebian nia oan mane Faustino Ximenes Belo haktuir, matebian nia knaar mak hanesan loro loron koa tua faan iha estrada ninin no iha loron 05 Julhu nee matebian hamutuk ho nia subrinu no be-aon sira hemu tua, maibe ho kondisaun lanu idozu refere sae tua atu koa iha tempu loraik mak monu rezulta mate fatin.
“Katuas hemu tua barak obriga aan sae tua monu kla iha tuku 16:00 loraik, tuku 17:00 hetan nia. Nia ho kondisaun lanu mak sae tua, tanba antes nee nia lanu mak sae tua. Hemu tua barak,” Faustino konta.
Oan nee aprezenta, relasiona insidente nee parte familia deside ona la lori matebian nia isin mate ba autopsia, tanba rekonhese matebian antes atu sae tua hodi koa iha parte loraik nian ho kondisaun lanu, maibe obriga aan sae tua nunee monu too mate fatin.
Entretantu matebian nia mate isin daudaun iha nia rezidensia Ossoua no parte familia liu husi Autoridade Suku Tirilolo husu ona apoiu kaisaun iha Diresaun Apoiu Sosial Munisipiu Baucau.
(tom)
