BAUCAU, STLTIMORLESTE.com – Uma neebe pertense ba idozu Luís Francisco idade 81 mutuk iha Suku Uailili, Postu Administrativu Baucau Vila, Munisipiu Baucau.
Komandante operasaun Autoridade Protesaun Sivil (APC-sigla português) Munisipiu Baucau, Francisco Viana Freitas aprezenta, uma pertense ba idozu refere mutuk iha parte madrugada loron 30 Junhu 2026 no parte APC Munisipiu Baucau simu informasaun iha parte dader, nunee orienta kedas ekipa APC nian ba terrenu fo apoiu emerjensia.
“Nia uma ahi han mutuk tiha tanba katuas mesak deit entaun labele salva sasan sira maibe salva nia aan deit ita fo ona apoiu emerjensia,” hateten Francisco Viana Freitas ba jornalista sira iha nia knaar fatin Tirilolo Baucau Vila, Kuarta (01/06/2026).
Nia esplika, durante ekipa APC Munisipiu Baucau iha terrenu nota katak idozu nia uma mutuk total, iha neebe sasan sira uma laran hanesan roupa, kulsaun, bikan, kanuru, sana, no seluk tan inklui osan idozu refere labele salva, tanba ahi lakan alastra makaas, nunee idozu salva deit nia aan ses husi situasaun refere ho sentimentu tristeza, tanba uma neebe durante fo mahon ba nia mutuk.
Komadante Operasaun APC Munisipiu Baucau nee informa, mezmu idozu nia uma mutuk no sasan sira inklui osan neebe iha la salva, maibe agradese, tanba idozu ho kondisaun diak iha momentu akontesementu ahi han nia uma.
“Kauza husi insendiu nee katak, katuas nee tein hela fahi nian ai la hamate entaun alarga fali ba nia uma,” Francisco akresenta
Nia sublina, idozu nia uma ahi han mutuk laos kauza husi problema seluk, maibe informsaun neebe APC rekoilha, iha momentu madrugada idozu refere tein animal hakiak hanesan fahi nia hahan no remata ona, maibe kauze ahi neebe nia sunu la hamate hotu nunee alarga fali ba nia uma too mutuk, tanba idozu refere nia uma tali.
No momentu neeba sasan sira la konsege salva, tanba idozu hela mesak no laiha komunidade ida besik atu salva nia sasan, tanba idozu refere laiha vizinhu.
“Idozu nia uma nee uma talin nia hela mesak nia uma mutuk ona agora nia hela iha familia nia uma,” Francisco katak.
Komadante APC Munisipiu Baucau nee deklara, husi insendiu nee parte APC kumpri nia misaun fo ona apoiu emerjensia hanesan hahan no laos hahan no rekoilha ona evidensia sira relata ona ba Nasional hein prosesu re-verifikasaun hafoin bele hatene, idozu refere bele hetan material rekuperasaun ou lae, tanba informsaun neebe iha, uma neebe pertense ba idozu refere atual mutuk laos uma permanente, maibe uma provizoriu ou uma toos nian.
Entretantu too notisia nee publika, STL seidauk halo komfirmasaun uma nain idozu Luís Francisco.
(tom)
