DILI, STLTIMORLESTE.com – Servisu Imigrasaun identifika feto estranjeira nain 16 ne’ebé suspeita viola regra viza turista atu hala’o atividade komersiál iha fatin karaoke sira iha kapital Dili.
Observasaun STL iha terenu katak, iha Domingu semana kotuk, ekipa operasaun Imigrasaun hala’o inspesaun no fiskalizasaun rotina ba hotel no fatin karaoke iha Dili, atu asegura kumprimentu Lei Imigrasaun.
Durante operasaun ne’e, autoridade konsege identifika feto estranjeira nain 16 iha fatin diferente sira. Agora, prosesu investigasaun no verifikasaun dokumentu sira kontinua.
Autoridade iha indikasaun katak feto estranjeira hirak ne’e uza viza turista, maibé hala’o atividade komersiál iha fatin karaoke balu.
Iha fatin hanesan, Ministru Interior, Francisco da Costa Guterres, hateten katak Servisu Imigrasaun sei prosesa kazu hirak ne’e tuir lei, antes foti desizaun kona-ba medida tuirmai.
Nia esplika katak, investigasaun kle’an sei determina medida apropriada, inklui posibilidade atu haruka sira fila ba nasaun orijen.
“Ita haree no haruka fila, tanba sira uza sala tiha viza. Bainhira viola viza, tenke hetan pena no labele tama tan mai Timor-Leste,” hatete Ministru Interior (MI), Francisco da Costa Guterres deklara ba jornalista sira, Kuarta-feira (14/10/2026).
Ministru Interior afirma katak, autoridade sei kontinua hala’o fiskalizasaun atu asegura sidadaun estranjeiru sira kumpre lei no kondisaun viza durante sira hela iha Timor-Leste.
(jen)
